سربراہ جے یو آئی ایف مولانا فضل الرحمان کی حکومت پر چڑھائی کرتے ہوئے کہا کہ عمران خان  نے کشمیر کو ٹرمپ کے ہاتھوں بیچ دیا ہے۔

تفصیلات کے مطابق سربراہ جمعیت علماء اسلام مولانا فضل الرحمان نے اسلام آباد میں پریس کانفرنس کرتے ہوئے کہا کہ بھارت نے  عالمی قراردادوں کو مسترد کرتے  ہوئے  کشمیر کو  بھارت کے جغرافیے  میں داخل کردیا اور ہمارے حکمران  تماشا دیکھتے رہے۔

مولانا فضل الرحمان نے کہا کہ سلیکٹڈ حکومت کی کوئی پالیسی نہیں ہے، ہماری سفارت کاری پوری دنیا میں ناکام ہوئی،امریکہ کے ٹرپ سے کپتان ٹریپ ہو کر آئے ،دنیا میں استعمال ہونے والوں میں ایک مہرہ ہمارا کپتان بھی ہے۔

جمعیت علماء اسلام کے سربراہ کا کہنا تھا کہ بھارت کے حالیہ فیصلے نے بین الاقوامی دستاویزات کی نفی کی ہے،سلامتی کونسل کہ قرار دادیں کشمیرکو حق خودارادیت اور متنازعہ علاقہ قرار دیتی ہیں۔

مولانا فضل الرحمان کا یہ بھی کہنا تھا کہ کشمیر بھارت کا حصہ نہیں،صرف عالمی قرار دادوں کی روشنی میں مسئلہ کشمیر کا حل ہو سکتا ہے،کشمیری 70 سال بھارتی مظالم برداشت کر رہے ہیں،اس وقت تاریخ انسانی کے سفاک دور سے کشمیری گزر رہے ہیں۔

مولانا فضل الرحمان نے کہا کہ کور کمانڈر کانفرنس میں اصولی موقف اپنایا گیا ہے،مودی سرکاری کا یہ اقدام اچانک نہیں،مودی نے کشمیر کی آئینی حیثیت اور آرٹیکل 370 کو تبدیل کرنے کا منشور بھارتی عوام کو دیا۔

سربراہ جے یو آئی ایف مولانا فضل الرحمان کا مزید کہنا تھا کہ پوری قوم کوآزادی کی جدوجہد میں کشمیریوں کی حمایت اور مدد کرنی چاہئے۔