وزیر خارجہ شاہ محمود قریشی نے کہا کہ بھارت کا کشمیر کی آئینی حیثیت پر یکطرفہ فیصلہ چین کو بھی پسند نہیں آیااور وہ سیکیورٹی کونسل میں پاکستان کی بھرپور حمایت کرے گا۔

تفصیلات کے مطابق وزیر خارجہ شاہ محمود قریشی کی اپنے چینی ہم منصب وانگ ژی سے ملاقات کے بعد میڈیا سے گفتگو میں کہا کہ چین نے تنازع کشمیر کے معاملے پر پاکستان کا ساتھ دینے کی یقین دہانی کرادی ہے۔

خارجہ شاہ محمود قریشی نے کہا کہ چین کے سٹیٹ کونسلر اور وزیر خارجہ وانگ ژی سے میری ڈھائی گھنٹے پر مشتمل ملاقات ابھی مکمل ہوئی ہے۔

وزیر خارجہ نے یہ بھی کہا کہ مصروفیات اور شارٹ نوٹس کے باوجود میں یہ نشست ، صدر شی کے حکم پر کر رہا ہوں کیونکہ پاکستان اور چین کی دوستی کی نوعیت مختلف ہے،پاکستان نے جو سیکورٹی کونسل میں جانے کا فیصلہ کیا ہے چین اس کی مکمل حمایت کریگا اور پاکستان کے ساتھ مکمل تعاون رکھے گا۔

شاہ محمود قریشی کا کہنا تھا کہ آج جب میں نے مقبوضہ جموں و کشمیر کے حوالے سے بھارت کے غیر آئینی اقدامات پر اپنے تحفظات چینی  وزیر خارجہ کے سامنے رکھے تو انہوں نے ہمارے موقف کی تائید کی ہے جو ابھی ان کی طرف سے پریس ریلیز کی شکل میں سامنے آجائے گا۔

شاہ محمود قریشی کا یہ بھی کہنا تھا کہ مجھے یہ بتاتے ہوئے انتہائی مسرت ہو رہی ہے کہ چین نے آج ایک مرتبہ پھر ثابت کیا کہ وہ پاکستان کا با اعتماد دوست ہے یہ دوستی آج بھی لازوال ہےاور اس پر جتنا فخر کیا جائے کم ہے۔

وزیر خارجہ نے کہا کہ بھارت کا کشمیر کے حوالے سے اقدام یکطرفہ ہیں،بھارتی اقدامات سے خطے کے امن و استحکام کو خطرات لاحق ہو سکتے ہیں، انہوں نے اتفاق کیا کہ مقبوضہ جموں و کشمیر ایک متنازع مسئلہ تھا اور ہے، اس مسئلے کو پر امن طریقے سے حل کیا جانا چاہیے تاکہ کشیدگی میں اضافہ نہ ہو۔

شاہ محمود قریشی کا کہنا تھا کہ اقوام متحدہ نے اسے متنازع علاقہ تسلیم کیا ہے اور اس کا حل بھی اقوام متحدہ کی قراردادوں کی روشنی میں ہونا چاہیے، میں نے انہیں آگاہ کیا کہ ہمیں خدشہ ہے کہ مقبوضہ جموں و کشمیر میں جب کرفیو اٹھایا جائے گا تو وہاں ظلم و بربریت کا دور شروع ہو گا، جس سے مزید خون خرابے کا اندیشہ ہے اور ردعمل کو آڑ بنا کر کوئی پلوامہ جیسی حرکت دوبارہ کی جا سکتی ہے۔

شاہ محمود قریشی کا مزید کہنا تھا کہ ہماری وزارتیں اور مشنز آپس میں روابط جاری رکھیں گے تاکہ ہماری اپروچ اور حکمت عملی مشترکہ ہو اور ہم یکسوئی سے آگے بڑھ سکیں۔