تر جمان دفتر خارجہ ڈاکٹر محمد فیصل نے کہا کہ پاکستان نے بھارت کوجاسوس کلبھوشن یادیو تک قونصلررسائی کی باضابطہ پیشکش کر دی۔

 تفصیلات کے مطابق ترجمان دفتر خارجہ نے ہفتہ وار بریفنگ میں کہا کہ کلبھوشن یادیو تک قونصلررسائی کی فراہمی سے متعلق بھارت کے جواب کا انتظار ہے۔

ڈاکٹرمحمد فیصل کا کہنا تھا کہ ٹرمپ کا کشمیر پر ثالثی سے متعلق بیان بڑی کامیابی ہے۔

ترجمان دفتر خارجہ کا یہ بھی کہنا تھا کہ مقبوصہ کشمیر میں مزید 10 ہزار بھارتی فو جیوں کی تعیناتی تشویشناک ہے ۔

ڈاکٹر محمد فیصل کا مزید کہنا تھا کہ لائن آف کنٹرول پر بھارت کی جانب سے نہتے شہریوں کو نشانہ بنانا قبول نہیں، بھارت کے غیر ذمہ دارانہ رویہ سے خطے کے امن کو سنگین خطرات لاحق ہیں۔

یاد رہے بھارتی جاسوس کلبھوشن یادیو کو 3 مارچ 2016ء کو پاکستان ایران سرحدی علاقے سے گرفتار کیا گیا تھا۔

اپریل 2018ء میں فوجی عدالت نے بھارتی جاسوس کو ملک میں دہشتگردی کی سرگرمیوں میں ملوث ہونے کا مجرم قرار دیتے ہوئے سزائے موت سنائی جس کے بعد بھارت نے اپنے جاسوس کلبھوشن سنگھ یادیو کی پھانسی رکوانے کے لیے عالمی عدالت انصاف میں درخواست دائر کی تھی۔

بعدازاں 15 مئی کو بھارتی درخواست پر سماعت کا آغاز ہوا، عالمی عدالت انصاف نے پاکستان میں دہشت گردی کی کارروائیوں میں ملوث جاسوس کلبھوشن یادیو کی بریت اور بھارت کے حوالے کرنے سے متعلق بھارتی درخواست کو مسترد کیا۔