وزیر خارجہ شاہ محمود قریشی کا کہنا ہے کہ کشمیر پر جاری بھارتی مظالم کی وجہ سے خطے کے امن و استحکام کو شدید نْقصان پہنچا ہے۔

وزیر خارجہ مخدوم شاہ محمود قریشی کا وزارت خارجہ میں ڈپلومیٹک کور سے خطاب میں کہا کہ 8 تاریخ کو ہم یہاں ملے تھے جب میں نے آپ کو ہندوستان کیطرف سے 5 اگست کو اٹھائے گئے بھارتی یکطرفہ اقدامات سے آگاہ کیا تھا جبکہ پاکستان نے اور کشمیریوں نے مکمل طور پر ان یکطرفہ اقدامات کو مسترد کر دیا گیا ہے۔

انہوں نے بتایا کہ کل دہلی میں نو پارٹیوں نے احتجاج کیا جس سے پتہ چلتا ہے کہ صرف حریت رہنماؤں نے ہی نہیں بلکہ باقی پارٹیوں نے بھی اسے مسترد کردیا ہے اور اس سلسلے میں بہت سے وزرائے خارجہ سے بات چیت ہوئی انہوں نے اس صورتحال پر تشویش کا اظہار کیا اور سب نے اس مسئلے کے پرامن حل اور مذاکرات پر زور دیا گیا ہے۔

وزیر خارجہ نے انہیں مقبوضہ کشمیر میں جاری مواصلاتی بلیک آؤٹ سے آگاہ کیا اور بتایا کہ موبائل سروس، انٹرنیٹ معطل ہیں، بین الاقوامی میڈیا کو بھی رسائی نہیں دی جا رہی ہے جو ہماری معلومات ہیں اس کے مطابق صورتحال انتہائی تشویشناک ہے۔

 شاہ محمود نے میڈیا کو مخاطب کرتے ہوئے کہا کہ پاکستان میڈیا کے ذریعے آگاہ کرنا چاہتا ہے کہ پاکستان کی جانب سے ہمیشہ مذاکرات کی حمایت کی گئی ہے کیونکہ پاکستان متعدد بار کہہ چکا ہے کہ دو ایٹمی قوتوں کو جنگ سے گریز کرنا چاہیے، یہ مشترکہ خودکشی کے مترادف ہو گا۔