بلوچستان کے صوبائی دارالحکوت کوئٹہ میں مسجد میں دھماکے کے نتیجے میں 5 افراد جاں بحق جبکہ بچوں سمیت 15سے زائدزخمی  ہوگئے۔

تفصیلات کے مطابق کوئٹہ کے نواحی علاقے کلی قاسم خان جامع مسجد کچلاک میں نماز جمعہ کے دوران دھماکاہوا جس کے نتیجے میں5 افراد جاں بحق جبکہ بچوں سمیت 15 سے زائد افراد زخمی ہوگئے۔

پولیس کے مطابق دھماکے کی اطلاع ملتے ہی امدادی اور ریسکیو ٹیمیں روانہ کردی گئی تھی ۔

پولیس کا کہنا ہے کہ دھماکہ پلانٹڈ ڈیوائس کے ذریعے کیا گیا  جبکہ بم پیش امام کے منبر کے نیچے نصب کیا گیا تھا۔

ملک کی مذہبی و سیاسی شخصیات نے دھماکے کی شدید مذمت کرتے ہوئے شہید افراد کے اہل خانہ سے دکھ اور افسوس کا اظہار کیا ہے۔

پاکستان کے وزیرِ اعظم نے جامع مسجد کچلاک میں ہونے والے دھماکے کی شدید مذمت کی اور اظہارِ افسوس کیا عمران خان کا مذید کہنا تھا کہ واقع سے متاثر ہونے والوں کے غم میں برابر کے شریک ہیں۔

چئیرمین قائمہ کمیٹی برائے داخلہ سینیٹر رحمان ملک  نے بھی کوئٹہ جامع مسجد کچلاک میں دھماکے کی شدید مذمت کرتےہوئے کہا کہ قیمتی انسانی جانوں کے ضیاع پر شدید دکھ اور افسوس ہے اور غمزدہ خاندانوں کے غم میں برابر کا شریک ہوں اور زخمیوں کے صحت یابی کیلئے دعاگو ہوں۔

رحمان ملک  کا مزید کہنا تھا کہ ایسے حملے پاکستان کے خلاف دشمن کی گھناؤنی سازش ہیں لہذا پوری قوم کو متحد ہوکر دشمن کی سازشوں کو ناکام کرنا ہوگا۔ ‏

پاکستان مسلم لیگ (ن) خیبرپختونخوا کے صدر انجینئر امیر مقام  نے بھی  کوئٹہ  مسجد میں دہشت گردی کی شدید مذمت کی اور افسوس کا اظہار کرتے ہوے کہا کہ  اللہ تعالی شہید ہونے والوں کے درجات بلند فرمائے اور متاثرہ خاندانوں کو یہ صدمہ برداشت کرنے کی ہمت دے۔

امیر مقام  نے جامع مسجد کچلاک میں ہونے والے دھماکے کے حوالے سے کہا کہ  دشمن کا مساجد کو نشانہ بنانا بزدلی کا ثبوت ہے ، مسجد اور نمازیوں کو نشانہ بنانے والے ہرگز مسلمان نہیں ہو سکتے۔

امیر مقام  کا کہنا تھا کہ دہشت گردی کے بڑھتے ہوئے واقعات کا سنجیدگی سے نوٹس لینے کی ضرورت ہے ۔