سرگودھا میں جعلی پیر نے 5 سالہ بچے کو جن نکالنے کے بہانے تشدد کا نشانہ بنا ڈالا، ننھے بچے کو تشویش ناک حالت میں ڈی ایچ کیو ہسپتال منتقل کر دیا گیا ہے۔

تفصیلاے کے مطابق پولیس نے کارروائی کرتے ہوئے جعلی پیر کو گرفتار کر لیا ہے۔

سرگودھا کے نواحی چک 47 شمالی میں جعلی پیر وسیم شاہ نے جن نکالنے کے بہانے 5 سالہ آہل رضا کو تشدد کا نشانہ بنا دیا جبکہ گھروالوں کا کہنا ہے کہ بیمار بچے آہل رضاء کو دم کروانے کے لیے اس کی والدہ پیر وسیم شاہ کے پاس لے کر گئی جس نے جن نکالنے کے بہانے اس کو بیہمانہ تشدد کا نشانہ بنا دیا۔

والدہ غزالہ یاسمین نے بتایا کہ بچے کو دم کروانے کے لیے پیر کے پاس لے کر گئی تو اس نے 100 روپے لیے اور جن نکالنے کے لیے میرے بیٹے کو چھڑی سے تشدد کا نشانہ بناتا رہا، بیٹے کی حالت بگڑنے لگی تو پیر نے 100 روپے واپس کر دیئے اور کہا کہ اسے واپس لے جاؤ جس کے بعد بچے کی والدہ اسے لے کر ڈٰی ایچ کیو اسپتال لے کر گئی۔

ہسپتال میں ڈاکٹروں کی طرف سے بچے کو بروقت طبی امداد کے باعث حالت خطرے سے باہر بتائی جا رہی ہے جبکہ بچے کے والد کی طرف سے پیر کے خلاف قانونی کارروائی کے لیے تحریری درخواست دیدی گئی ہے۔