مقبوضہ کشمیر میں بھارتی مظالم کیخلاف سینیٹ میں متفقہ قرار داد منظور کرلی  گئی اور کشمیرکااسٹیٹس تبدیل کرنے کے بھارتی اقدام کومسترد کردیا گیا۔

تفصیلات کے مطابق چئیرمین صادق سنجرانی کی زیر صدارت سینیٹ اجلاس ہوا ، قائد ایوان شبلی فراز نے مقبوضہ کشمیر میں بھارتی مظالم کیخلاف قرارداد پیش کی ۔

قرارداد میں  کشمیریوں سے یکجہتی کا اظہار کیا گیا اور بھارت کی جانب سے مقبوضہ کشمیر میں جارحیت کی مذمت کی گئی۔

قرارداد میں کہا گیا کہ نریندر مودی کے کشمیر میں اقدامات اقوام متحدہ کی قراردادوں کی منافی ہے۔ کشمیر میں غیر قانونی طور پر کرفیو نافذ کیا گیا ہے۔

قرارداد میں اس عزم کا اظہار کیا گیا کہ مسئلہ کشمیر کو اجاگر کرنے کیلئے ہر فورم کا استعمال کیا جائے۔اس سے قبل کشمیر پر بحث بھی ایوان میں جاری رہی جبکہ اراکین نے اس بات پر زور دیا کہ مودی حکومت کو موثر اور عملی جواب دینے کی ضرورت ہے۔

اس موقع پر سینیٹر رضا ربانی  نے مسئلہ کشمیر پر سینیٹ کی کمیٹی بنانے کی تجویز دیدی،کہا کہ جب امہ ‏پر وقت آیا تو پاکستان کھڑا ہو جاتا ہے اب جب پاکستان پر برا وقت آیا ہے تو مسلم امہ ‏ساتھ کھڑی نہیں ہوئی۔

سینٹ سے خطاب کرتے ہوئے سینیٹررحمن ملک نے کہا کہ ہمیں ‏مسئلہ کشمیر پر ایک کمیٹی یا ٹاسک فورس بنانے کی ضرورت ہے،ہمیں آج کشمیر مدد ‏کےلئے پکا ررہا ہے۔

جبکہ مشاہد حسین سید نےخطاب کرتے ہوئے کہا کہ مودی کی مذہبی انتہاپسندی کوبھارت نےبھی مستردکردیاہے۔

سینیٹڑمشاہد اللہ  نے کہا کہ جغرافیہ تبدیل کرنے کی بھارتی غلطی نےکشمیریوں کویکجا کردیا، ہمیں ایسا متحد ہونا ہے جیسے ایٹمی  پروگرام کیلئے  پوری قوم متحد ہے۔