کشمیرکورگروپ کے اجلاس میں فیصلہ کیا گیا کہ دنیا بھر میں کشمیر کاز کو اجاگر کیا جائے گا۔

وزیراعظم عمران خان کی زیر صدارت کشمیر کورگروپ کا اجلاسمیں مقبوضہ کشمیر کے محصور عوام کے ساتھ اظہار یکجہتی کیا گیا۔

اجلاس میں سیاسی، سفارتی اور قانونی محاذ پر کشمیر کا مسئلہ مزید اُجاگر کرنے کی کوششیں تیز کرنے کا فیصلہ کیا گیا۔

کشمیر کور گروپ کےاجلاس میں وزیر خارجہ، وزیر قانون و انصاف، چیئرمین پارلیمانی کمیٹی برائے کشمیر، وزیراعظم کی معاون خصوصی برائے اطلاعات و نشریات، اٹارنی جنرل آف پاکستان اور دیگر سینئر حکام نے شرکت کی۔

کشمیر کور گروپ کے اجلاس میں شرکاء نے کہا کہ سلامتی کونسل اور عالمی برادری نے مقبوضہ کشمیرکی صورتحال کی سنگینی کو تسلیم کیا، انسانی حقوق کی تنظیموں، انسانی بنیادوں پر کام کرنے والے اداروں نے بھی تشویش ظاہر کی۔

شرکا کا کہنا تھا کہ عالمی اداروں نے مقبوضہ کشمیر سے فوری کرفیو اٹھانے کا مطالبہ بھی کیا۔

اجلاس میں مقبوضہ کشمیر کے محصور عوام سے یکجہتی کا اعادہ کیا گیا اور5 اگست 2019ء کے بعد سے لاکھوں کشمیریوں کے مسلسل لاک ڈائون اور بھارتی جبر اور بڑھتے ہوئے مظالم کی شدید الفاظ میں مذمت کی گئی۔

یاد رہے کہ وزیر اعظم عمران خان 23 ستمبر کو ایک بار پھر امریکہ دورے کے لئے روانہ ہونگےجبکہ امریکہ دورے کے لئے وزیر خارجہ شاہ محمود قریشی وزیراعظم سے پہلے امریکہ پہنچیں گے۔

وزیراعظم عمران خان امریکہ دورے میں اقوام متحدہ جنرل اسمبلی کے اجلاس میں شرکت کرینگے جس میں مسئلہ کشمیر پر پاکستان کا بھرپور موقف پیش کیا جائیگا۔