کراچی میں شروع ہونے والی صفائی مہم کے موقع پر وفاقی وزیر علی زیدی کے خطاب کے دوران نعرے بازی اور بدنظمی پیدا ہو گئی۔

تفصیلات کے مطابق علی زیدی کے خطاب کے دوران شرکاء میں موجود بعض افراد نے شور شرابہ شروع کردیا ۔

وفاقی وزیر نے انتظامیہ کو شور شرابہ کرنے والے افراد کو تقریب سے باہر نکالنے کا حکم بھی دیا تاہم اس کے باوجود شور شرابہ جاری رہا، پی ٹی آئی کارکنان نے علی زیدی سے منتخب نمائندوں کے علاقوں سے لاپتہ ہونے کا شکوہ کیا۔

علی زیدی نے کہا شور شرابہ کرنے والے شہر کی صفائی کے لیے نہیں آئے،ہمیں تنقید سے فرق نہیں پڑتا،اسمبلی میں بھی سنتے رہتے ہیں۔

کارکنان کی جانب سے مسلسل نعرے بازی کے باعث وفاقی وزیر تقریر ادھوری چھوڑ کر چلے گئے۔

واضح رہے کہ وفاقی وزیر بحری امورعلی زیدی نے کلین کراچی مہم کے تحت14 اگست تک کراچی کو کچرے سے پاک اور تمام نالوں کی صفائی مکمل کرنے کا دعویٰ کر دیا ہے۔

علی زیدی کا کہنا تھا کہ کلین کراچی مہم کے تحت نالوں کے اوپر قائم تجاوزات کو ہٹانا پڑا تو انھیں ہٹا دیا جائے گا، انھوں نے برساتی نالوں پر رہنے والے خاندانوں سے رضاکارانہ طور پر جگہ چھوڑنے کی اپیل کرتے ہوئے کہا کہ انھیں پاکستان ہاؤسنگ اسکیم میں ترجیحی بنیادوں پر گھر فراہم کیے جائیں گے۔