معاون خصوصی ڈاکٹر فردوس عاشق اعوان نے کہا کہ دنیا کی کوئی طاقت کشمیر اور پاکستان کو جدا نہیں کرسکتی ہے۔

اسلام آباد میں معاون خصوصی ڈاکٹر فردوس عاشق اعوان کا کشمیری حریت رہنما یاسین ملک کی اہلیہ مشعال ملک کے گھر آمد پر میڈیاسے گفتگو  میں مقبوضہ وادی کے شہداء کو سلام پیش کرتے ہوئے کہنا تھا کہ کشمیر کی بہو، بیٹیاں تحریک جدوجہد آزادی میں عظیم قربانیاں دے رہی ہیں جبکہ وزیراعظم عمران خان اور پاکستان کا ہر شہری کشمیری بہن بھائیوں کیساتھ کھڑا ہے۔

ڈاکٹر فردوس عاشق اعوان نے کہا کہ پاکستان کسی صورت کشمیری بہن بھائیوں کا ساتھ نہیں چھوڑے گا، پاکستانی حکومت اورعوام کشمیری عوام کی آزادی تک چین سے نہیں بیٹھیں گے اور نہ ہی کشمیری حریت پسندوں کی قربانیاں رائیگاں جائیں گی۔

ان کا کہنا تھا کہ مودی سرکار نے مقبوضہ وادی کی حیثیت تبدیل کرکے کشمیریوں کے حقوق پر ڈاکہ ڈالا ہے جبکہ خطے کا کوئی بھی ملک جارحانہ بھارتی اقدام کی حمایت نہیں کرتا۔

یاسین ملک کی اہلیہ مشعال ملک نے حکومت پاکستان اور پاکستانی عوام کا شکریہ ادا کرتے ہوئے کہا کہ کشمیری عوام وزیراعظم عمران خان کی جانب سے  ان کا مقدمہ لڑنے پر مشکورہیں، مظلوم کشمیری عوام کی آواز پاکستان ہے۔

مشعال ملک نے مزید کہا کہ بھارت نے کشمیری قیادت کو گرفتار کرکے مقبوضہ وادی کو یرغمال بنارکھا ہے اور مسئلہ کشمیر کو فوری طور پر سلامتی کونسل میں اٹھایا جانا چاہیئے۔