وفاقی وزیر ریلوے شیخ رشید نے کہا کہ مقبوضہ کشمیر میں مقیم کشمیریوں کو یقین دلانا چاہتا ہوں کہ ہمارا مرنا ،جینا کشمیری عوام کے ساتھ ہے،ہم آپ کو اکیلا نہیں چھوڑیں گے۔

تفصیلات کے مطابق اسلام آباد ائرپورٹ پروزیرریلوے شیخ رشید احمد کا برطانیہ روانگی سے پہلے کشمیر پراپنے بیان میں کہا کہ بھارت نے کشمیر میں ڈیڑھ کروڑ مسلمانوں کی زندگی اور موت کو یکجا کر دیا ہے ،ہم کشمیریوں کی عملی مدد کریں گے۔

وزیرریلوے کا کہنا تھا کہ بھارت نے جو کچھ کرنا تھا کردیا ہے، بھارت نے کشمیر میں فوجیں اتار کرغاصبانہ قبضہ کر لیا ہے۔

شیخ رشید کا یہ بھی کہنا تھا کہ ہمیں اب اپنی قومی ذمہ داری پوری کرنی ہے، جس دن کرفیو اٹھا پتہ لگے گا کشمیری کس جوش و جذبے سے اٹھتے ہیں۔

وزیرریلوے شیخ رشید نے مزید کہا کہ لارڈ نذیر کی دعوت پر برطانیہ جا رہا ہوں، واپسی پر میں آزاد کشمیر کےعلاقوں کا دورہ کروں گا۔

اس سے قبل وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نےیوم آزادی پر پیغام دیتے ہوئے کہاہےکہ پاکستان آج یوم آزادی کشمیریوں سے یکجہتی کے طورپرمنائے گا۔

معاون خصوصی اطلاعات کا کہنا تھا کہ کشمیری عوام کوحق خودارادیت ملنے تک تقسیم ہند کا ایجنڈا مکمل نہیں ہوسکتا آج کے قائد کے فرمودات پرعمل پیرا ہونے کے عزم کا اعادہ کرنے کا دن ہے کشمیر میں بہنے والے لہو کے چھینٹے ہمارے دلوں پر گرتے ہیں۔

واضح رہے کہ آزاد جموں و کشمیر کی قانون ساز اسمبلی کے اجلاس سے خطاب کیا تھا جس میں عمران خان کا کہنا تھا کہ بھارتی وزیراعظم نریندر مودی نے کشمیر کی خصوصی حیثیت ختم کرکے بہت بڑی اسٹریٹیجک غلطی کردی جو اسے بہت مہنگی پڑے گی۔