قومی اقتصادی کونسل کی ایگزیکٹو کمیٹی نے کراچی میں نکاسی آب اور کراچی ریڈ لائن منصوبے کی منظوری دیدیی گئی جبکہ مجموعی طور پر579 ارب روپے مالیت کےترقیاتی منصوبوں کی منظوری دی گئی ہے۔

اسلام آباد میں مشیرخزانہ عبدالحفیظ شیخ کی زیرصدارت قومی اقتصادی کمیٹی کی ایگزیکیٹوکمیٹی کا اجلاس ہوا ہے۔

تفصیلات کے مطابق مشیر خزانہ حفیظ شیخ نے نیوز کانفرنس کرتے ہوئے کہا ہے کہ عام لوگوں اور کسانوں کی زندگی میں بہتری لانا ترجیح ہے، کراچی کے لیے 95 ارب روپے کے دو بڑے منصوبے منظور کیے ہیں۔

ان کا کہنا تھا کہ پاکستان چاہتا ہے کہ کیپٹل مارکیٹ ترقی کرے، ترقی ہوگی تو روزگار بڑھے گا جبکہ متعدد شعبوں میں سرمایہ کاری کے مواقع ہیں۔

مشیر خزانہ نے کہا کہ زرعی شعبوں کے منصوبوں کے لیے 8 ارب روپے منظور کیے، 27 لاکھ مزید لوگوں کے لیے صحت کے پروگرام شروع کررہے ہیں۔

حفیظ شیخ نے کہا کہ 3 ارب درخت لگانے کا منصوبہ منظور کیا گیا ہے، منظور شدہ منصوبوں سے ملکی معیشت کو فائدہ ہوگا۔

انہوں نے بتایا کہ ایکنک نے گوادر مکران کو نیشنل گرڈ سے منسلک کرنے کی منظوری دی ہے۔

کراچی پیکج کے حوالے سے بات کرتے ہوئے عبدالحفیظ شیخ کا کہنا تھا کہ حکومت نے شہر قائد کے لیے 95 ارب روپے کے دو منصوبے منظور کیے ہیں، نمائش سے لےکر ملیر تک گرین لائن منصوبہ شروع کیا جائے گا۔

عبدالحفیظ شیخ نے یہ بھی بتایا کہ سندھ میں تعلیم کے فروغ اور نظام میں بہتری کے لیے سیکنڈری اسکولوں کے لیے 13 ارب روپے منظور کیے گئے ہیں۔