برطانوی رکن پارلیمنٹ عمران حسین کا کہنا ہے کہ بھارتی حکومت نے یکطرفہ اقدام سے مقبوضہ کشمیر کی اسٹیٹس بدل دیا ہے۔

برطانوی پارلیمانی وفد نےاسلام آباد میں اسپیکر قومی اسمبلی اسد قیصراورچیئرمین کشمیر کمیٹی فخر امام سے ملاقات کی۔

ملاقات میں برطانوی رکن پارلیمنٹ اسٹیفنز ٹمزنےمقبوضہ کشمیرکی سنگین صورتحال پر تشویش کا اظہار کرتے ہوئے کہا کہ کشمیرکے مسئلے پر بات چیت کیلئے پاکستان کا دورہ کیا۔

پاکستان کےدورے پرآئےبرطانوی پارلیمانی وفد نےمقبوضہ کشمیر کی خصوصی حیثیت ختم کرنے کا یکطرفہ اقدام واپس لینے کا مطالبہ کردیا۔

برطانوی رکن پارلیمنٹ کا کہنا تھا کہ ہمیں نہیں معلوم کشمیرمیں کیا ہورہا ہے۔

برطانوی پارلیمانی وفد نے کہا کہ بھارت نےکشمیرمیں بلیک آؤٹ کررکھا ہے،مقبوضہ کشمیر کی صورتحال انتہائی پریشان کن  ہے،ہم یہ معاملہ برطانوی پارلیمنٹ میں اٹھائیں گے۔

انہوں نے کہا کہ اس وقت لاکھوں کشمیری جیل میں ہیں، برطانوی اراکین پارلیمنٹ کشمیریوں کی آواز دنیا بھر میں اٹھائیں۔

برطانوی رکن پارلیمنٹ نے کہا کہ بھارت نے کشمیراقوام متحدہ کی قراردادوں کی خلاف ورزی کی، کشمیر میں جو کچھ ہو رہا ہے ہمارے لیے باعث تشویش ہے، عالمی برادری کو فوری طور پر کشمیر کی صورتحال کا نوٹس لینا چاہیے۔

برطانوی وفد نے یہ بھی کہا کہ برطانوی پارلیمنٹ پاکستان کے ساتھ اپنے دوستانہ تعلقات کو مزید وسعت دینے کا خواہاں ہے، برطانیہ پاکستان کے ساتھ تمام شعبوں میں تعاون کو جاری رکھے گا، مسئلہ کشمیر کا پرامن حل خطے کی سلامتی کا ضامن ہے۔

برطانوی رکن پارلیمنٹ نے یہ مزید کہا کہ ہم خود بھی کنٹرول لائن کا دورہ کرینگے،بھارت کو فوری طور پر اپنے اقدامات واپس لینا ہوں گے۔

اس موقع پر اسد قیصرکا کہنا تھا کہ خود بھی برطانیہ جا کرکشمیرکی آواز اٹھاؤں گا،ہم چاہتے ہیں برطانوی عوام کھل کر سامنے آئیں اور ذمہ داریاں پوری کریں جبکہ چیئرمین کشمیر کمیٹی فخرامام کا کہنا تھا کہ مسئلہ کشمیر پر پوری پاکستانی قوم متحد ہے، عالمی برادری اس مسئلے کا لازمی نوٹس لے اور سلامتی کونسل کے اراکین کرفیو اٹھانے کا مطالبہ کریں۔