چیئرمین پیپلزپارٹی بلاول بھٹوزرداری نے کہا ہے کہ سلیکٹڈ حکومت نے اپنےایک سال دورحکومت میں خارجہ پالیسی اورمعیشت کو تباہ کردیاہے۔

تفصیلات کےمطابق چیئرمین پیپلزپارٹی بلاول بھٹوزرداری نےسکردومیں جلسےسے خطاب کرتے ہوئےکہا کہ سلیکٹڈ وزیر اعظم نےایک طرف ملک کی معیشت آئی ایم ایف کے پاس گروی رکھ دی ہےاوردوسری طرف پاکستان کوسفارتی سطح پربھی تباہ کردیاہے۔

بلاول بھٹوزرداری کا کہنا تھا کہ اقتدارمیں آنےسے پہلےوعدےکرنےآسان ہیں،اگر وعدےجھوٹ پرمبنی ہوں تو نبھانےمشکل ہوتےہیں۔

بلاول بھٹوزرداری کا یہ بھی کہنا تھا کہ یہ وہ حالات ہیں جس میں ہرشہری پریشان ہے کہ وہ دووقت کی روٹی کھاسکتا ہے یا نہیں۔

بلاول بھٹوزرداری نے کہا کہ اقتدارمیں آنے سے پہلےعمران خان نے کہا تھا کہ  میں خود کشی کرلوں گا لیکن کسی کے آگے ہاتھ نہیں پھیلاؤں گا مگر سلیکٹڈ حکومت نے ہمارے پانچ سالہ دور سےزیادہ قرض ایک سال میں لیاہے۔

چیئرمین پیپلزپارٹی بلاول بھٹوزرداری نے یہ بھی کہا کہ ایک کروڑ نوکریوں کا وعدہ کرکے سلیکٹڈ حکومت نےلوگوں سے روزگارتک چھین لیا ہے، ملک کے کسان پریشان ہے کہ اس کو فصل کی قیمت ملے گی بھی یا نہیں۔

چیئرمین پیپلزپارٹی کا کہنا تھا کہ ڈالرز کی بارش تو دور کی بات،آج ڈالر 160روپے کا ہے،انھوں نے کہا کہ عمران خان نےوعدہ کیا تھاحکومت میں آیا توکرپشن ختم کردونگا،احتساب کرونگا،حساب کرونگا، کیسا یکطرفہ احتساب ہے30ارب کی پشاورمیٹرو100ارب کی ہوگئی کوئی پوچھنے والا نہیں۔

بلاول بھٹو کا جلسےسےخطاب مٰیں یہ بھی کہنا تھا کہ یہ کیسا احتساب ہےکہ مالم جبہ کی کرپشن کی فائل چھپا دی جاتی ہے یہ کیسا احتساب ہے؟ یہ توسیاسی انتقام ہے۔

بلاول بھٹوزرداری کا کرپشن کے حوالے سے کہا کہ عام آدمی کو نئے پاکستان میں اپنا حق لینا ہو،بچےکواسکول میں داخل کراناہویا پھر مریض کواسپتال میں داخل کرانا ہو اسے ہر صورت کرپشن کا سامنا کرنا پڑتا ہیں۔

چیئرمین پیپلزپارٹی نےکہا کہ ہماری ثقافت ، ہمارا دین ہماری روایت ہے کہ ہم خواتین کی عزت کرتے ہیں لیکن سلیکٹیڈ صرف بزدل ہی عورتوں سے جیل بھرتے ہیں۔

 بلاول بھٹوزرداری نے یہ بھی کہا کہ بغیر کسی ثبوت کے اپوزیشن کو جیل میں ڈال دیاہے۔

چیئرمین پیپلزپارٹی بلاول بھٹوزرداری کامزید کہنا تھا کہ خان اور اسکی کابینہ کے لوگ ڈریں، ظلم کرنیوالوں کو اپنے ظلم کا حساب دیناہو گا۔