چیئر مین پاک سر زمین پارٹی کا کہنا ہے کہ ان کی جماعت مظلوم کشمیریوں کے ساتھ ہے ۔

پاک سر زمین پارٹی کے سربراہ مصطفیٰ کمال  نے مرکزی ایوان صحافت مظفرآباد میں پریس کانفرنس کرتے ہوئے کہا کہ  میں وزیر اعظم پاکستان سے اپیل کرتا ہوں کہ وہ ہندوستان پر حملہ کرنے کا پوچھیں نہیں ،بھارت مظلوم کشمیریوں پر جو مظالم ڈھا رہا ہے ایسے حالات میں  ہم جنگ  ہی کریں گے۔

انہوں نے کہا کہ مقبوضہ کشمیر کی عوام سے اظہار یکجہتی کرنے مظفرآباد آیا ہوں ۔ کشمیر کے ایشو پر کسی کو سیاست نہیں کرنی چاہیے،اب وقت آ گیا ہے کہ کشمیریوں کے ساتھ کھڑے ہونا ہو گا۔

مصطفیٰ کمال کا مزید کہنا تھا کہ بھارت نے ستر سال سے کشمیریوں پر ظلم کے پہاڑ توڑے ہیں ،کشمیریوں کی قربانیاں رائیگاں نہیں جائیں گی۔ مودی نے ہندوستان کی تباہی کا بٹن خود ہی دبا دیا ہے،ہندوستان میں اب کئی ریاستیں بنیں گی۔

چیئر مین پاک سرزمین پارٹی کا کہنا تھا کہ ہم نے کشمیر کی جنگ کراچی میں لڑی ہے، ہم نے کراچی میں را کے منصوبے کو ناکام بنایا ہے۔

پاک سرزمین پارٹی کے سربراہ مصطفیٰ کمال کی صدر آزادکشمیر سردار مسعود خان سے ملاقات  بھی ہوئی۔

مصطفی کمال نے پارٹی وفد کے ہمراہ صدر آزادکشمیر سے ملاقات کی۔

 دونوں رہنماوں کے درمیان کشمیر کی موجودہ صورتحال پر تبادلہ خیال کیا گیا۔

 مصطفی کمال نے صدر آزادکشمیر کو مکمل یکجہتی کا یقین دلایا اور کہا کہ بھارت پاکستان کو کمزور کرنے کی کوشش کرتا ہے, کراچی سے کشمور اور پورے ملک کے عوام کشمیریوں کے ساتھ ہیں۔

مصطفیٰ کمال نے مزید کہا کہ دنیا کو بتانا ہوگاکہ اگر بھارت نے جارحیت نہ روکی تو جنگ کریں گے۔

 صدر آزادکشمیر نے مصطفیٰ کمال سے کشمیر آمد پر شکریہ ادا کیا۔

اس موقعے پرصدر ٓزاد کشمیر نے کہا کہ کشمیری پاکستان کے بقاء کی جنگ لڑرہے ہیں, کشمیر کے عوام کشمیر بنے گا پاکستان کے نعرے لگاتے ہیں۔ اور پاکستان کے پرچم میں دفن ہوتے ہیں۔