معاون خصوصی اطلاعات ڈاکٹر فردوس عاشق اعوان نے کشمیر کے متعلق پاکستان کا کردار بیان کرتے ہوئے کہا کہ کشمیر پاکستان کا دفاعی حصار ہے۔

اسلام آباد میں صحافی تنظیموں کی مقبوضہ کشمیر کے عوام کے ساتھ اظہار یکجہتی ریلی سے معاون خصوصی اطلاعات ڈاکٹر فردوس عاشق اعوان نے خطاب کرتے ہوئے کہا کہ مظلوم کشمیریوں کیساتھ یکجہتی کے اظہار پر ریلی شرکاء کو خوش آمدید کہتے ہیں۔

تفصیلات کے مطابق معاون خصوصی برائے اطلاعات فردوس عاشق اعوان نے اسلام آباد میں میڈیا سے گفتگو کرتے ہوئے کہا کہ پاکستان اور کشمیر لازم و ملزوم ہیں، مقبوضہ کشمیر میں بھارت نے ظلم کی انتہا کردی ہے۔.

انہوں نے کہا کہ کشمیریوں کے گھروں کے باہر بھارتی فوجی کھڑے ہیں، کشمیریوں کو ان کے گھروں سے باہر نہیں نکلنے دیا جارہا ہے، پوری قوم کشمیری بھائیوں کے ساتھ ہے۔

انکا مزید کہنا تھا کہ پاکستان مظلوم کشمیریوں کی موثر آواز بن کر عالمی سطح پر ہر فورم پر جانے کیلئے پرعزم ہے اور صحافیوں کا نہتے کشمیریوں کے حق میں لائق تحسین اقدام عالمی برادری کا ضمیر جھنجھوڑے گا۔

فردوس عاشق اعوان نے کہا کہ مودی بیانیے کی ایک نہیں چلنے دیں گے، کشمیر پاکستان کا دفاعی حصار ہے، بھارت انسانی حقوق کا قاتل بن گیا ہے۔

  انہوں نے کہا کہ مقبوضہ کشمیر میں مسلمانوں سے مذہبی آزادی بھی چھین لی گئی ہے، مقبوضہ کشمیر میں کرفیو سے کھانے پینے کی اشیا کی قلت ہوگئی ہے۔

واضح رہے کہ گزشتہ روز فردوس عاشق اعوان کا کہنا تھا کہ بھارت کشمیریوں کے ساتھ ظلم کررہا ہے، کشمیری بھارتی مظالم سے تنگ آکر برہان وانی کررہے ہیں۔