لندن میں بانی ایم کیو ایم کی سدک پولیس اسٹیشن میں پیشی جس کے بعد ان کی ضمانت میں دوسری بار توسیع کردی گئی۔

تفصیلات  کے  مطا بق لندن پولیس نے  ایک بار پھر بانی ایم کیو ایم کو  مزید سوالات اور تفیتش  کے  لئے  پولیس اسٹیشن  طلب کیا جہاں ان سے الزامات سے متعلق پوچھ گچھ کی گئی ۔

 ایم کیو ایم کے بانی کی ضمانت ختم ہو رہی تھی اور ان سے مزید  تحقیقات کے حوالے سے سوالات کے جوابات کے لئے پولیس اسٹیشن طلب کیا  گیا تھا، جبکہ انویسٹیگیشن  ٹیم کی سربراہی میٹ کے کاؤنٹر ٹیررازم کمانڈ کے افسران کررہے ہیں۔

ذرائع کا مزید کہنا ہے کہ   پاکستان سے مزید شواہد ملنے کے بعد لندن پولیس بانی ایم کیو ایم سے نئے سوالات کرنا چاہتی ہے، وہ انٹرویو دینے کے لیے وسطی لندن کے پولیس اسٹیشن پہنچ گئے ہیں۔

اس سے قبل بانی ایم کیو ایم کو میٹ پولیس کے کاؤنٹر ٹیررازم کمانڈ کے افسران نے نفرت انگیز تقریر کرنے کے جرم میں رواں برس 11 جون کو گرفتار کیا گیا تھا جہاں انہوں نے گرفتاری کے بعد ایک رات حوالات میں  بھی  گزاری تھی۔

گرفتاری کے وقت پولیس افسران نے بانی ایم کیو ایم کی رہائش گاہ کی تلاشی بھی لی تھی، اس کے بعد بانی ایم کیو ایم کو جولائی میں ایک مرتبہ ضمانت میں توسیع بھی مل چکی ہے۔

واضح رہے کہ بانی ایم کیو ایم کے خلاف اگست 2016ء میں نفرت انگیز تقریر کے الزام میں تحقیقات جاری ہیں۔