وزیراعظم پاکستان عمران خان کی سعودی عرب کے ولی عہد شہزادہ محمد بن سلمان سے ملاقات ہوئی۔

عمران خان کی سعودی عرب کے ولی عہد شہزادہ محمد بن سلمان سے ملاقات میں باہمی دلچسپی اور دوطرفہ تعلقات پر گفتگو ہوئی۔

وزیراعظم عمران خان نے سعودی  ولی عہد کو کشمیر کی تازہ ترین صورتحال سے آگاہ کیا اور سعودی تیل کی تنصیبات پر حملے پر مذمت بھی کی۔

ملاقات میں وزیر خارجہ شاہ محمود قریشی، مشیر خزانہ حفیظ شیخ، معاون خصوصی برائےسمندر پار پاکستانیز سید ذوالفقار بخاری، سیکرٹری خارجہ سہیل محمود اور سعودی عرب میں پاکستان کے سفیرراجہ علی اعجاز بھی موجود تھے۔

واضح رہے کہ آج وزیراعظم پاکستان عمران خان سعودی ولی عہد محمد بن سلمان کی دعوت پر دو روزہ سرکاری دورے پر سعودی عرب پہنچ  گئے ہیں۔ جدہ کے رائل ٹرمینل پر مکہ کے گورنرخالد الفيصل بن عبد العزيز نے انکا استقبال کیا۔

 استقبال کے موقع پر سعودی عرب میں پاکستان کے سفیرراجہ علی اعجاز، قونصل جنرل خالد مجید، سعودی حکام اور قونصلیٹ کے افسران بھی موجودتھے۔.

عمران خان سعودی قیادت سے مقبوضہ کشمیر کی صورت حال پر بات چیت کریں گے جبکہ وزیراعظم بھارت کے غیر قانونی اقدام پر سعودی ولی عہد محمد بن سلمان سے مسلسل رابطے میں بھی ہیں۔

عمران خان سعودی عرب کے دو روزہ دورے کے بعد وہیں سے اقوام متحدہ کے اجلاس میں شرکت کے لیے امریکہ جائیں گے۔

اس موقع پر وزیر خارجہ شاہ محمود قریشی، مشیر خزانہ عبدالحفیظ شیخ اور مشیر تجارت عبدالرزاق داؤد بھی عمران خان کے ہمراہ دورے پر مو جود ہوں گے۔

یاد رہے کہ عمران خان نے رواں ماہ میں اب تک دو بار سعودی ولی عہد محمد بن سلمان سے ٹیلی فون پر رابطہ کیا اور انھیں کشمیر کی صورتحال سے آگا ہ کیا تھا۔