وزیراعلیٰ پنجاب سردار عثمان بزدار نے شہید لانس نائیک محمد تیمور اسلم کی رہائش گاہ پراُن کے اہل خانہ سے ملاقات کی۔

تفصیلات کے مطابق وزیراعلیٰ پنجاب نے میڈیا سے گفتگو کرتے ہوئے کہا کہ 6 ستمبر شہداء اور ان کے اہلِ خانہ کو یا د رکھنے کا دن ہے، شہیدوں کی قربانیوں کے باعث ہم پُرامن فضاء میں سانس لے رہے ہیں۔

سردارعثمان بزدارنے کہا کہ شہید فوجی جوان نے قوم کے کل کو محفوظ بنانے کے لئے اپنا آج قربان کیا ہے، وطن پر نثار ہونے والے شہدا پر ناز ہے، وطن پر جانیں نثار کرنے والے قوم کے ہیرو ہیں۔.

وزیراعلیٰ پنجاب عثمان بزدار نے یہ بھی کہا کہ شہید لانس نائیک محمد تیمور اسلم نے پاک وطن کی حفاظت کرتے ہوئے اپنے خون کا نذرانہ پیش کیا، شہید محمد تیمور اسلم کے اہل خانہ کا بلند حوصلہ تعریف کے لائق ہے۔

اس موقع پر وزیراعلیٰ نے شہید لانس نائیک محمد تیمورکی دفاع وطن کے لئےعظیم قربانی کو خراج عقیدت پیش کرتے ہوئے ان کے درجات کی بلندی کے لئےدعا کی۔.

وزیراعلیٰ پنجاب کا کہنا تھا کہ محمد تیمور اسلم جیسے دلیر بیٹے پاک دھرتی کا فخر ہیں، محمد تیمور اسلم نے شہادت کا عظیم رتبہ پایا ہے، ہمارا ایمان ہے کہ شہید ہمیشہ زندہ رہتے ہیں، محمد تیمور اسلم کی عظیم قربانی رائیگاں نہیں جائے گی۔.

وزیراعلیٰ پنجاب عثمان بزدار کا مزید کہنا تھا کہ شہداء کے اہل خانہ سے مکمل یکجہتی کا اظہار کرتے ہیں، شہداء کے خاندانوں کی ہر ممکن دیکھ بھال کی جائے گی۔

خیال رہے کہ آج وزیر اعلیٰ پنجاب نے وزیر اعظم عمران خان سے ملاقات کی تھی، اس موقع پر پنجاب کے انتظامی اور سیاسی امور پر تبادلہ خیال ہوا۔.