وزیراعلیٰ سندھ سید مراد علی شاہ کا کہنا ہے کہ شہر قائد میں کچرے کی سیاست بڑھتی جا رہی ہے۔

کراچی کے ایک نجی ہوٹل میں میڈیا سے بات چیت کرتے ہوئے وزیراعلیٰ سندھ سید مراد علی شاہ  کا کہنا تھا کہ قانون کے مطابق شہر کی صفائی اور کچرا اٹھانے کا کام ڈی ایم سیز کا ہے  جبکہ نالوں کی صفائی کا کام کے ایم سی کا ہے ۔

وزیر اعلیٰ نے کہا کہ ہم نے سندھ سالڈ ویسٹ مینجمنٹ قائم کی ۔ ڈی ایم سیز نے سندھ سالڈ ویسٹ مینجمنٹ کو درخواست کی کہ وہ ان کے علاقوں کا کچرا اٹھائیں ۔

مراد علی شاہ کا کہنا تھا کہ سندھ سالڈ ویسٹ مینجمنٹ نے ضلع جنوبی کراچی میں پہلے کام شروع کیا ،انتخابات کے دنوں میں یہ کام کچھ سست ہوگیا ۔جنوبی اور شرقی اضلاع میں سندھ سالڈ ویسٹ مینجمنٹ کچھ بہتر کام کر رہی ہے ۔

وزیر اعلیٰ سندھ نے کہا کہ ڈی ایم سی کے انتخابات ہوجائیں  پھر اگر ان کی کائونسلز چاہیں گی تو سندھ سالڈ ویسٹ مینجمنٹ کچرا اٹھائے گی ۔ ہمارے دیگر اداروں کی ایریاز میں اگر دیکھا جائے تو وہاں بھی کچرا پڑا ہے، مگر وہ بھی سندھ حکومت کےکھاتے میں ہیں ۔

انہو ں نے مزید کہا کہ وفاقی حکومت نے نالوں سے کچرا اٹھا کر کھلی جگہ پھینک دیا ،اسے لینڈ فل سائیٹ نہیں لے گئے ، اس سے مسائل بڑھےاورشہر میں مکھیاں ہوگئیں ۔میں نے وفاقی وزیر علی زیدی سے خود بات کی اور کہا کہ کچرا لینڈ فل سائیٹ پہ پھینکیں ۔

مراد علی شاہ نے کہا کہ میں نے ڈی سی کو ڈسٹرکٹ وائیز کچرا اٹھانے کے اہداف دیے ہیں،ڈپٹی کمشنرز نے جہاں جہاں کچراہے اس کی تصاویر بنائیں اور علاقے وائیز تفصیلات جمع کیں ۔یہ کچرا اٹھا کر اپنے اپنے اضلاع میں عارضی جی ایس ٹی بنائی اور وہاں سے وہ کچرا لینڈ فل سائیٹ لے گئے۔