لاہور میں سینٹرل پولیس آفس کے باہر بزرگ خاتون سے بدسلوکی کرنے والے پولیس اہلکار کو گرفتار کرکے نوکری سے معطل کر دیا گیا۔

تفصیلات کے مطابق لاہور میں آئی جی پنجاب کے دفتر کے باہر شکایت لیکر آئی ہوئی معمر خاتون سے  ڈیوٹی پر مامور پولیس اہلکار کی طوفانی بد تمیزی اور انتہائی نامناسب رویہ دیکھنے میں آیاہے۔

موقع پر موجود ایک شخص نے پورے واقعے کی ویڈیو بنا کر سوشل میڈیا پر اپ لوڈ کردی جو وائرل ہوگئی۔

آئی جی پنجاب کیپٹن (ر)عارف نواز خان کا سی پی او کے گیٹ پر معمر خاتون سے بد کلامی کے واقعہ کا نوٹس.بدکلامی کے مرتکب اےایس آئی آصف علی کو معطل کرکے فوری طورپرگرفتار کرکے محکمانہ وقانونی کاروائی شروع شہریوں سے غیر مناسب رویہ برتنے والوں کی پولیس فورس میں کوئی جگہ نہیں۔ آئی جی پنجاب pic.twitter.com/bhvLm0j7p7

Advertisement

— Punjab Police Official (@OfficialDPRPP) September 5, 2019

ویڈیو میں دیکھا جا سکتا ہے کہ پنجاب پولیس کا ایک اہلکارایک معمر خاتون سے نہ صرف بدسلوکر رہا ہے بلکہ خاتون پر چیختے اور ان کی چھڑی اٹھا کر دور پھینکتے ہوئے بھی دیکھا جا سکتا ہے۔

واقعہ کی منظر عام پر آنے والی فوٹیج  کا نوٹس لیتے ہوئے آئی جی پنجاب کیپٹن (ر)عارف نواز خان نے معمر خاتون سے بدتمیزی کرنے والے اسسٹنٹ سب انسپکٹر ( اے ایس آئی)  آصف علی کو فوری معطل کرکے گرفتارکرنے کا حکم دے دیا۔

ذرائع کے مطابق معمر خاتون سے بدتمیزی کرنے والے پولیس اہلکار کے خلاف اختیارات کا ناجائز استعمال کرنے پر تھانہ انارکلی میں مقدمہ درج کر کے انہیں گرفتار کرلیا گیاہے اور متعلقہ تھانے کے حوالات میں بند کردیا۔

واضح رہے کہ زشتہ دنوں پنجاب پولیس کی حراست میں گجرانولہ کے رہائشی صلاح الدین کی پولیس حراست میں ہلاکت اور اس پر مبینہ پولیس تشدد کی تصاویر اور ویڈیو سامنے آنے کی وجہ سے پنجاب حکومت اور پولیس کو شدید تنقید کا سامنا ہے۔