چیئرمین نیب جسٹس جاوید اقبال نے کہا ہے کہ بدعنوانی ملک کی ترقی و خوشحالی کی راہ میں بڑی رکاوٹ ہے۔

تفصیلات کے مطابق قومی ادارہ احتساب (نیب) کے چیئرمین جسٹس جاوید اقبال کی زیر صدارت میں ایگزیکٹو بورڈ کا اجلاس ہوا، جس میں اپوزیشن لیڈر شہباز شریف کے خلاف کرپشن کیس میں انکوائری شروع کرنے کی منظوری دی گئی۔

اجلاس میں ڈپٹی چیئرمین، پراسیکیوٹر جنرل، آپریشنز اور پراسیکیوشن حکام شریک ہوئے۔

نیب اعلامیہ کے مطابق اپوزیشن لیڈر شہباز شریف پر اوقاف اراضی کی غیر قانونی الاٹمنٹ کا الزام ہے۔

اس موقع پر چیئرمین نیب کا کہنا تھا کہ بدعنوانی ملکی ترقی میں بڑی رکاوٹ ہے، نیب نے گزشتہ 22ماہ میں 71ارب بدعنوان عناصر سے برآمد کرکے قومی خزانہ میں جمع کروائے۔

جسٹس جاوید اقبال کا یہ بھی کہنا تھا کہ بزنس کمیونٹی ملک کی ترقی کیلئے ریڑھ کی ہڈی کی حیثیت رکھتی ہےاور بزنس کمیونٹی کے مسائل کے حل کیلئے خصوصی سیل باقاعدگی سے کام کررہے ہیں۔

چیئرمین نیب نے کہا کہ بدعنوان عناصر سے لوٹی گئی رقم برآمد کرنے کے لیے کوشاں ہیں اور بیوروکریسی سمیت تمام طبقوں کی عزت نفس کو یقینی بنانے  کےعزم پر سختی سےعمل پیرا ہیں۔

جسٹس جاوید اقبال نے اجلاس میں ہدایت کی کہ انکوائریز اور انویسٹی گیشنز وقت مقررہ پر انجام تک پہنچائی جائیں۔

واضح رہے اس سے قبل چیئرمین نیب جسٹس (ر) جاوید اقبال نے اپنے ایک بیان میں کہا کہ میگا کرپشن مقدمات  کو منطقی انجام تک پہنچانا نیب کی اولین ترجیح ہے، ملک سے بدعنوانی کے خاتمہ کے لیے تمام اقدامات اٹھائے گئے ہیں۔

جسٹس ریٹائر جاوید اقبال کا یہ بھی کہنا تھا کہ بدعنوانی کے 600 ریفرنس احتساب عدالتوں میں جمع کرائے گئے اور بدعنوانی کے 1200 ریفرنس نیب عدالتوں میں زیر سماعت ہیں جبکہ بدعنوان عناصر کو نیب کورٹس میں سزا دلوانے کی شرح 70 فیصد ہے۔