بھارتی فوج کی بڑھتی ہوئی اشتعال انگیزی کے باعث وزیراعظم آزادکشمیر نے ایل او سی کے تمام سیکٹرز کا دورہ کیا۔

تفصیلات کے مطابق وزیراعظم آزاد کشمیر راجہ فاروق حیدرخان نےلائن آف کنٹرول دورے میں عوامی اجتماع سے خطاب کرتے لائن آف کنٹرول پر بھارتی جارحیت کا نشانہ بننے والوں سےاظہار یکجہتی کیا اور نشانہ بننے والوں کےلواحقین سے تعزیت بھی کی۔

ایل اوسی کے بھمبر سیکٹرکے دورے  پر راجہ فاروق حیدر نے بھارتی فائرنگ اور بمباری سے کنٹرول لائن پر بسنے والے شہریوں کی املاک کو ہونے والے نقصان کا جائزہ لیا اورانہیں ہرممکن  تعاون کا یقین دلایا۔

وزیراعظم آزاد کشمیر کا کہنا تھا کہ مودی خطے کو تباہی کی طرف لے جانا چاہتا ہے،ہمیں کشمیریوں کے خون کے ساتھ خون شامل کرنا ہو گا۔

  جلسے سے خطاب میں راجہ فاروق حیدرخان کا یہ بھی کہنا تھا کہ جنونی آر ایس ایس خون کی ہولی کھیل رہی ہے، مودی دوسرا ہٹلر ہے،اسکےعزائم انتہائی خطرناک ہیں، مودی خطہ کو تباہی کی طرف لے جانا چاہتا ہے۔

وزیراعظم آزاد کشمیرنے کہا کہ ہندوستانی فوج کی گیدڑ بھبھکیوں سے ڈرنے والے نہیں،انھوں نے کہا کہ مسلمان شہادت سے نہیں ڈرتا ہمارے نبی رحمت نے بھی اس کی خواہش کی تھی،دفاع وطن کا معاملہ آیا تو مسلح افواج کے ہمراہ آزادکشمیر کے شہری لڑینگے۔

وزیراعظم آزاد کشمیرراجہ فاروق حیدرخان نے مزید کہا کہ لائن آف کنٹرول پر بسنے والوں کے لیے آزادکشمیرحکومت نے خصوصی منصوبہ بندی کررکھی ہے، ترجیحی بنیادوں پرانہیں سہولیات کی فراہمی یقینی بنائیں گے۔