پاکستان پیپلز پارٹی کے چیئرمین بلاول بھٹو زرداری نے شہدائے کربلا کو سلام پیش کرتے ہوئے کہا ہے کہ حضرت امام حسینؓ اور ان کے ساتھیوں کی عظیم قربانی ہمیں یہ درس دیتی ہے کہ ظلم و جبر اور جھوٹ کے خلاف مزاحمت کرنی چاہیئے، خواہ اپنی جان گنوانی ہی کیوں نہ کرنا پڑے ۔

تفصیلات کے مطابق یومِ عاشورہ کے موقعے پر پی پی پی چیئرمین بلاول بھٹو زرداری نے کہا کہ ظلم اور جھوٹ کے خلاف مزاحمت کے لیے امامِ عالی مقام کی زندگی روشنی کا مینار ہے۔

بلاول بھٹو کا کہنا ہے کہ حضرت امام حسینؓ اُن چند عظیم ہستیوں میں سے ہیں، جنہوں نے زندگی اور موت، فتح اور شکست اور عزت و رسوائی کی تعریف نئے سرے سے متعین کی۔

بلاول بھٹو زرداری کا یہ بھی کہنا تھا کہ مقبوضہ کشمیر میں جبر و تشدد کی جاری نئی لہر اور فلسطین سمیت دنیا کے دیگر علاقوں میں مظالم کے باعث اس سال یومِ عاشور کی اہمیت و افادیت مزید بڑھ گئی ہے۔

 بلاول بھٹو زرداری نے کہا کہ امام حسین رضہ کی پیروی کرکے مظلوم لوگ جہاں بھی ہوں ناانصافی اور ظلم کے خلاف کامیابی سے ہمکنار ہوں گے۔

 بلاول بھٹو زرداری نے یہ بھی کہا کہ جھوٹ اور جبر اُن عسکریت  و انتھاپسندوں کے بھی ہتھکنڈے ہیں، جو غلط تصورات کو مذہب سے جوڑتے ہیں ،عوام کو اس طرح کے متعصب اور جنونیوں کے عزائم سے خبردار رہنا چاہیئے،جب کبھی ظلم کسی بھی شکل و روپ میں سر اٹھائے، تو اسے ہر بار جذبہ و شجاعتِ امام حسین رضہ سے ہی مٹانا چاہیئے۔

 پاکستان پیپلز پارٹی کے چیئرمین بلاول بھٹو زرداری نے مزید کہا کہ آج کے دن ہم کربلا کے دیگر تمام شہداء کو بھی سلام پیش کرتے ہیں،اللہ تعالی ان سب کو اپنی رضا و خوشنودی عطا فرمائے۔