وزیر خارجہ شاہ محمود قریشی نے کہا ہے کہ عمران خان نے اقوام متحدہ میں بھارت کے ہوش اڑا دئیے ہیں۔

تفصیلات کے مطابق وزیرخارجہ شاہ محمود قریشی نے اقوام متحدہ کے باہر احتجاجی مظاہرین سے خطاب کرتے ہوئے کہا کہ وزیراعظم نے جنرل اسمبلی میں وزیراعظم نے بھارت کو آئینہ دکھایا اور حقائق سامنے رکھے ہیں

مظاہرین سے خطاب کرتے ہوئے وزیرخارجہ کا کہنا تھا کہ وزیراعظم عمران خان نے اقوام متحدہ میں کشمیریوں کا مقدمہ پیش کیا۔

شاہ محمود قریشی کا کہنا تھا کہ اگر بھارت وزیراعظم کے خطاب پر جواب دے گا تو ہم بھی جواب الجواب دیں گے۔

وزیر خارجہ کا یہ بھی کہنا تھا کہ اسلامو فوبیا سے متعلق وزیراعظم عمران خان نے کھل کر بات کی ہے جبکہ او آئی سی کے آئندہ کے لائحہ عمل پر سعودی وزیر خارجہ عادل الجبیر سے مذاکرات ہوئے ہیں۔

وزیرخارجہ شاہ محمود قریشی کا اپنے خطاب میں مزید کہنا تھا کہ پاکستان پہنچ کر مظفرآباد اور آزاد کشمیر جائیں گے۔

واضح رہے اس سے قبل نیویارک میں بھارتی وزیراعظم نریندر مودی کی اقوام متحدہ کی جنرل اسمبلی اجلاس میں خطاب سے قبل کشمیریوں نے یو این آفس کے باہر احتجاجی مظاہرہ کیا تھا۔

احتجاج میں پاکستانی کمیونٹی سمیت بڑی تعداد میں کشمیریوں نے شرکت کی تھی ، مظاہرین نے مقبوضہ کشمیرمیں بھارتی ظلم و جبر کے خلاف مظاہرہ میں کشمیر کی آزادی کا مطالبہ کیا تھا ۔

مظاہرین نے کشمیریوں سے بھرپور اظہار یکجہتی کیلیے ہاتھوں میں’مودی دہشت گرد ہے‘  کے پلے کارڈز اور آزاد کشمیر کے جھنڈے بھی پکڑ رکھےاور بھارتی بربریت کے خلاف ’مودی قاتل‘ کے نعرے بھی لگائے۔