سندھ حکومت نے عاشورہ کے موقع پر 8 سے دس محرم تک کراچی میں موٹرسائیکل کی ڈبل سواری پر پابندی عائد کردی ہے۔

تفصیلات کے مطابق سندھ حکومت نے آج سے تین دن کیلئے کراچی میں موٹرسائیکل کی ڈبل سواری پر پابندی لگادی جبکہ خواتین، بچے، بزرگ، معذور افراد اور صحافی ڈبل سواری کی پابندی سے مستنیٰ ہوں گے۔

وزیراعلیٰ سندھ کا کہنا ہے کہ تین دن کیلئے موٹر سائیکل کی ڈبل سواری پر پابندی کے علاوہ وفاقی وزارت داخلہ کو جلوس کے اطراف موبائل فون سروس معطل کرنے کی تجویز بھی دے دی۔

وزیراعلیٰ کا یہ بھی کہنا تھا کہ فیصلہ کسی بھی ناخوشگوار واقعے سے بچنے اور امن وامان کی صورت حال برقرار رکھنے کے لئے کیا گیا۔

سندھ  حکومت نے موبائل فون پر پابندی کی تجویز وفاقی وزارت داخلہ کو بھیج دی ہے جبکہ فول پروف سکیورٹی کیلئے جلوسوں کی گزرگاہوں پر سی سی ٹی وی کیمرے بھی نصب کیے جائیں گے۔

واضح رہے اس سے قبل یکم ستمبر کو وزیراعلیٰ سندھ کی صدارت میں محرم الحرام میں امن وامان کے حوالے سے اجلاس ہوا، اجلاس میں چیف سیکرٹری سندھ سید ممتاز شاہ، صوبائی مشیر قانون مرتضی وہاب، ڈی جی رینجرز میجر جنرل عمر احمد بخاری، انسپکٹر جنرل پولیس سندھ ڈاکٹر کلیم امام اور دیگر اہم افسران بھی موجود تھے۔

اجلاس سے خطاب کرتے ہوئے وزیراعلی سندھ نے کہا تھا کہ گزشتہ تین سالوں کے دوران صوبہ سندھ میں کوئی بڑا واقعہ پیش نہیں آیا۔ انہوں نے اس سے یہ ظاہر ہوتا ہے کہ حکومت کی سیاسی عزم، قانون نافذ کرنے والے اداروں پولیس، رینجرز اور انٹیلیجنس ایجنسیوں کی سخت محنت اور قربانیوں کی بدولت شہر میں امن و امان کی بحالی ممکن ہوئی ہے۔