احتساب عدالت نے میگا منی لانڈرنگ اور پارک لین ریفرنس میں آصف علی زرداری اور فریال تالپورکے جوڈیشل ریمانڈ میں 12 نومبر تک توسیع کر دی ہے۔

تفصیلات کے مطابق جج محمد بشیر نے میگا منی لانڈرنگ اور پارک لین ریفرنسز پر سماعت کی، سابق صدر آصف علی زرداری اوران کی ہمشیرہ فریال تالپور کو سخت سیکورٹی میں اڈیالہ جیل سے احتساب عدالت لایا گیا،دوران سماعت آصف علی زرداری کے وکیل لطیف کھوسہ نے دلائل دیئے کہ میڈیکل بورڈ کی رپورٹ کے باوجود آصف علی زرداری کو ہسپتال منتقل نہیں کیا گیا۔

عدالت نے آصفہ بھٹو کی توہین عدالت کی درخواست پر رپورٹ مانگی تھی، جیل حکام سے پوچھا جائے کیوں عمل نہیں کیا جا رہا۔

ذرائع کے مطابق نیب پراسیکیوٹرکا کہنا تھا کہ قانون دیکھنا ہوگا کہ کیا توہین عدالت ہے یا نہیں۔

 لطیف کھوسہ بولے کہ توہین عدالت جیل حکام نے کی، نیب کیوں بول رہا ہے، نیب ریاست کا نمائندہ ہے، ریاست توہین عدالت کرنے والوں کے ساتھ نہیں کھڑی ہوتی۔

اس کے ساتھ ساتھ لطیف کھوسہ نے آصف علی زرداری کو جیل میں ذاتی مشقتی فراہم کرنے کی استدعا بھی کی۔

جواب میں نیب پراسیکیوٹر نے کہا کہ کوئی باہر سے آکر خدمت نہیں کرتا، کل کو بیویاں بھی کہیں گی کہ جیل میں قید ان کے شوہروں کی خدمت کرنے دی جائے۔

دلا ئل سننے کے بعدعدالت نے سہولیات فراہمی کی درخواست پر فیصلہ محفوظ کرلیاہے۔

 عدالت نے میگا منی لانڈرنگ اور پارک لین ریفرنس میں آصف علی زرداری اور فریال تالپور کو 12 نومبر کو دوبارہ پیش کرنے کا حکم دیتے ہوئے سماعت ملتوی کر دی۔

واضح رہے کہ آصف علی زرداری سے ان کے صا حبزادے بلاول بھٹو اور بیٹی آصفہ ذرداری سمیت پارٹی کے دیگررہنمائوں نے ملاقات بھی کی۔

کیس کی سماعت سے پہلے کمرہ عدالت میں داخلے کی اجازت نہ ملنے پرکچھ جیالے آپے سے باہر ہوگئے اور پولیس اہلکاروں سے گالم گلوچ بھی دیکھی گئی جبکہ سیکیورٹی کے سخت انتظامات کیے گئے۔