امریکی کانگریس میں ڈیموکریٹ پارٹی کے اراکین ہایمز اور مالونے کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی ہے۔

تفصیلات کے مطابق ملاقات میں پاک امریکہ تعلقات، مقبوضہ جموں و کشمیر کی صورتحال سمیت باہمی دلچسپی کے امور پر تبادلہ خیال کیا گیا جبکہ فریقین کا پاک امریکہ دو طرفہ تجارت سمیت مختلف شعبوں میں تعاون کے فروغ پر اتفاق بھی ہوا ہے۔

ملاقات کے دوران وزیر خارجہ شاہ محمود قریشی کا کہنا تھا کہ پاکستان امریکہ کے ساتھ دو طرفہ تعلقات کو خصوصی اہمیت دیتا ہے کیونکہ دونوں ممالک نے دہشت گردی سمیت خطے کو درپیش چیلنجز کا مل کر مقابلہ کیا ہے۔

شاہ محمود قریشی نے بتایا کہ بہت سے پاکستانی امریکہ میں کثیر الجہتی شعبہ جات میں اپنی خدمات سر انجام دے رہے ہیں انہوں نے مزید بتایا کہ پاکستان نے سیاحوں اور کاروباری حضرات کی سہولت کے لیے “نئ ویزہ رجیم” متعارف کروائی ہے۔

انکا مزید کہنا تھا کہ نئے پاکستان میں بیرونی سرمایہ کاری اور سیاحت کیلئے بہترین مواقع موجود ہیں۔

ملاقات میں کشمیر کی صورتحلا کے متعلق انکا کہنا تھا کہ مقبوضہ جموں و کشمیر میں گذشتہ 58 روز سے مسلسل کرفیو نافذ ہے بھارت کی جانب سے انسانی حقوق کی سنگین خلاف ورزیوں کا سلسلہ جاری ہے جبکہ مقبوضہ جموں و کشمیر کے 80 لاکھ نہتے کشمیریوں کو بھارتی استبداد سے نجات دلانے کے لیے اپنا کردار ادا کرنا ہوگا۔