پی آئی اےانتظامیہ نے تین سال کے دوران 10 کروڑ 65 لاکھ  روپے مالیت کا مسافروں کے لیے منگوایا جانے والا کھانا ضائع کردیا۔

تفصیلات کے مطابق بول نیوز قومی ایئرلاائن کی ایک اور نااہلی سامنے لے آیا، پی آئی اے مال مفت دل بے رحم کی  مثال بن گئی۔

پی آئی اے فلائٹ کچن کی آڈٹ رپورٹ نے بھانڈا پھوڑ دیا ہے کہ سابق دور حکومت میں پی آئی اے انتظامیہ نے کروڑوں روپے اضافی کھانے پر خرچ کرڈالے۔

آڈٹ جنرل کی  رپورٹ کے مطابق مالی سال 2013ء سے 2015ء کے دوران پی آئی اے میں 55 لاکھ 58 ہزار 284 مسافروں نے سفر کیا جب کہ 60 لاکھ 72 ہزار 839 مسافروں کے لیے کھانے کا انتظام کیا گیا جبکہ 5  لاکھ 14 ہزار 554  مسافروں کے اضافی کھانے کا خرچہ 7 کروڑ 25 لاکھ 72 ہزار 526 روپے ہوا۔

آڈٹ رپورٹ میں نقصان کا ذمہ دار انتظامیہ کی ناقص منصوبہ بندی کو قرار دیا گیا ہے جبکہ اس معاملے کے بارے میں پی آئی اے انتظامیہ کو 2016ء اور نومبر 2018ء میں آگاہ  کرنے کے باوجود انتظامیہ نے کروڑوں روپے کے اخراجات کا جواب نہیں دیا۔

رپورٹ میں یہ بھی بتایا گیا ہے کہ صرف علامہ اقبال انٹرنیشنل ایئرپورٹ لاہور پر اسی عرصے میں 4 کروڑ 40 روپے کا کھانا ضائع ہوا اور مجموعی طور پر تین سال میں ملکی خزانے کو اضافی کھانے کی مد میں 10 کروڑ 65 لاکھ روپے کا نقصان ہوا۔