لاہور ہائیکورٹ نے مریم نواز کی ضمانت پر رہائی کی درخواست پر سماعت کل تک کےلئے ملتوی کر دی ہے، وکلا نے دلائل مکمل کرلیے جبکہ کل نیب کے وکیل جوابی دلائل دیں گے۔

تفصیلات کے مطا بق عدالت نے مریم نواز اور نیب کے وکلاء کو بحث کیلئے طلب کیا تھا، جسٹس علی باقر نجفی کی سربراہی میں دو رکنی بنچ نے مریم نواز کی درخواست پر سماعت کی جبکہ درخواست میں نیب ودیگر کو بھی فریق بنایا گیا ۔

ذرائع کے مطا بق گز شتہ روز چودھری شوگرملز کیس میں سابق وزیر اعظم میا ں محمد نواز شریف کی صاحبزادی مریم نواز کی رہائی کی درخواست پر سماعت ہوئی،جسٹس علی باقر نجفی نے کہا کہ ڈائریکٹر جنرل نیب لاہور نے درخواست ملتوی کرنے کی استدعا کی ہے، وکیل مری نواز نے کہا ڈی جی نیب لاہور کو تو عدالت نے نوٹس ہی نہیں کیا، ہم آج ہی عدالت کے سامنے کیس بریف کر دیتے ہیں جس پر جسٹس علی باقر نجفی نے کہا آپ نیب کے وکیل کی موجودگی میں کیس پر دلائل دیجیئے گا۔

اسپیشل پراسیکیوٹرجہانزیب بھروانہ عدالت میں پیش نہ ہوئے ، نیب پراسیکیوٹر نے بتایا کہ اسپیشل پراسیکیوٹر اسلام آباد میں ہیں اس لیے پیش نہ ہوسکے، جس پر عدالت نے مریم نواز کی درخواست ضمانت پر سماعت کل تک ملتوی کر دی۔

واضح رہےکہ 8 اگست کو نیب نے چوہدری شوگرملز منی لانڈرنگ کیس میں مریم نوا ز کو تفتیش کے لئے بلایا گیا تھا لیکن وہ نیب دفتر میں پیش ہونے کے بجائے والد سے ملنے کوٹ لکھپت جیل چلی گئیں تھیں، تفتیشی ٹیم کے سامنے پیش نہ ہونے پر نیب ٹیم نے انھیں یوسف عباس کو گرفتار کرلیا تھا۔

ذرائع کے مطابق نیب کے تفتیشی افسر کی جانب سے عدالت میں جمع کرائی گئی رپورٹ میں انکشاف کیا گیا تھا کہ مریم نواز، نوازشریف اور شریک ملزموں نے 2000ملین کی منی لانڈرنگ کی، ملزمان کےاثاثے ذرائع آمدن سے مطابقت نہیں رکھتے۔