آمدن سے زائد اثاثوں کے کیس میں نیب کی تین رکنی ٹیم نے شہباز شریف کے گھر جانے کا ارادہ ملتوی کر دیا ہے اوراب نیب کی ٹیم شہباز شریف کوسوالنامہ بھجوائے گی۔

تفصیلات کے مطابق لاہور ویسٹ مینجمنٹ کمپنی کرپشن اور آمدن سے زائد اثاثوں کے کیس میں نیب کی تین رکنی ٹیم نے آج شہباز شریف کے گھر جانے کا فیصلہ کیا تھا۔

 ذرائع کے مطابق شہباز شریف سے آمدن سے زائد اثاثوں اور رمضان شوگر ملز سے متعلق بھی سوال کیے جائیں گے، نیب کی ٹیم اس سے قبل بھی شہباز شریف کو مراسلہ جاری کر چکی ہے تاہم شہباز شریف کے مصروف ہونے کے باعث ان کے گھر نہیں گئی تھی۔

سوال نا مے کے مطابق شہباز شریف سے سوال کیا جائے گا کہ وہ بتائیں محکمہ خزانہ اور قانون کی مخالفت کے باوجود کمپنی بنانے کی منظوری کیوں دی، سالڈ ویسٹ مینجمنٹ کا پی ایم یو فعال ہونے کے باوجود کمپنی کیوں بنائی، کیا صفائی کمپنی بنانے سے قبل اس کے منافع کی تحقیق کروائی گئی تھی، کمپنی کے استحکام اور اس کے کم خرچ ہونے کی تحقیق کرائی گئی تھی یا نہیں؟۔

نیب کی تین رکنی ٹیم میں ایڈیشنل ڈائریکٹر محمد آفتاب، ایڈیشنل ڈائریکٹر محمد ارشد اور ڈپٹی ڈائریکٹر خرم شہزاد شامل ہیں۔

دوسری جا نب ترجمان شریف فیملی عطاء اللہ تارڑ کا اس سلسلے میں کہنا ہے کہ آمدن سے زائد اثاثہ جات کیس سے متعلق نیب کا نوٹس موصول ہو گیا ہے۔

نیب کے سوالنامے کے مطابق محکمہ خزانہ، قانون کی رائے کے برعکس ویسٹ مینجمنٹ کمپنی سمری کیوں منظورکی، فعال پراجیکٹ یونٹ کے باوجود کمپنی کی ضرورت کیوں پیش آئی، صفائی کمپنی سے پہلے منافع، اس کے کم خرچ کی تحقیق کرائی گئی تھی یا نہیں اور غیر ملکی کمپنیز کو 320ملین ڈالر کا ٹھیکہ آؤٹ سورس کرنے کا اختیار کس نے دیا؟

 نیب نوٹس کے بارے میں شہباز شریف اپنی قانونی ٹیم سے مشاورت کر رہے ہیں۔

واضح رہے کہ نیب ویسٹ شہباز شریف کیخلاف مینجمنٹ کمپنی اور آمدن سے زائد اثاثہ جات کیس ، منی لانڈرنگ کیس ، ایل ڈبلیو ایم سی کرپشن کیس اور چوہدری شوگر ملز کی تحقیقات کر رہا ہے جبکہ ویسٹ مینجمنٹ کیس میں شہباز شریف کو تین مرتبہ طلب کیاگیا مگر وہ پیش نہیں ہوئے۔