حکومت کی جانب سےجمیت علمائے اسلام (ف)کے آزادی مارچ سے قبل اہم اعلان،حکومت نےجے یو آئی (ف) کی ذیلی تنظیم انصارالاسلام کو کالعدم قرار دینے کا فیصلہ کرلیاہے۔

ذرائع کے مطابق حکومت نےجمعیت علمائے اسلام ف کی ذیلی تنظیم کو کالعدم قرار دینے کا بڑافیصلہ کرلیاہے جس کے تحت وزارت داخلہ نے جمعیت علمائے اسلام ف کی ذیلی تنظیم انصارالاسلام کوکالعدم قرار دینے کے لیے سمری وزارت قانون اورالیکشن کمیشن کوارسال کردی ہے۔

وزارت داخلہ کی جانب سے وزارت قانون اورالیکشن کمیشن کوبھیجی گئی سمری میں کہا گیا ہے کہ جے یو آئی (ف) کی ذیلی تنظیم لٹھ بردار ہے اور قانون اس کی اجازت نہیں دیتا۔

خیبرپختونخواحکومت کا جے یو آئی (ف) کے’باوردی‘محافظ کےدستےکیخلاف کارروائی کااعلان کیاگیاہے۔

ذرائع کاکہناہے کہ وزارت قانون کو ارسال کی گئی سمری میں مزید کہا گیا ہے کہ قانون میں کسی قسم کی مسلح ملیشیا کی اجازت نہیں دی جاسکتی۔

ذرائع نےمزیدبتایا کہ جے یو آئی (ف) میں شامل تنظیم پارٹی منشور کی شق نمبر 26 کے تحت الیکشن کمیشن میں بھی رجسٹرڈ ہے۔

خیال رہے کہ چند روز قبل جے یو آئی (ف) کے باوردی محافظ دستے کی ایک ویڈیو وائرل ہوئی تھی جس میں دیکھا گیا تھا کہ مولانا فضل الرحمان محافظ دستے سےسلامی لے رہے ہیں۔

بعد ازاں خیبرپختونخوا حکومت نے ویڈیو وائرل ہونے کے بعد جے یو آئی (ف) کے محافظ دستے کے خلاف کارروائی کا اعلان بھی کیاتھا۔

یاد رہےکہ اپوزیشن کی جانب سے حکموت کےخلاف احتجاجی مارچ کے لیے وزیراعظم عمران خان کی ہدایت پر پرویزخٹک کی سربراہی میں سینئر ارکان پر مشتمل کمیٹی تشکیل دے دی گئی ہے، جس میں 7 ارکان شامل ہیں۔

وزیراعظم کی ہدایت پرتشکیل دی گئی کمیٹی سیاسی انتشار سے بچنے کیلئے اپوزیشن سے مذاکرات کرے گی جس کیلئےکمیٹی کو مذاکرات کا مکمل اختیار دے دیا گیا ہے ۔