احتساب عدالت نے زائد اثاثے اور رمضان شوگرملز کیس میں حمزہ شہباز کے جوڈیشل ریمانڈ میں  چودہ دن کی توسیع کردی ہے۔

تفصیلات کے مطابق احتساب عدالت نے زائد اثاثے اور رمضان شوگرملز کیس میں پنجاب اسمبلی کے اپوزیشن لیڈر حمزہ شہباز کے جوڈیشل ریمانڈ میں 14 دن کی توسیع کردی ہے ، احتساب عدالت کے ایڈمن جج چوہدری امیرمحمد خان نے سماعت کی۔

لاہور کی احتساب عدالت میں اپوزیشن لیڈر پنجاب اسمبلی حمزہ شہباز کیخلاف آمدن سے زائداثاثہ جات اور رمضان شوگرملز کیس کی سماعت ہوئی ۔

احتساب عدالت نے حمزہ شہباز کو 16 اکتوبر کو دوبارہ عدالت میں پیش کرنے کا حکم بھی دیاہے جبکہ آئندہ سماعت پر نیب کے تفتیشی افسر سے مکمل رپورٹ طلب بھی کر لی۔

حمزہ شہباز کو سخت سکیورٹی میں لاہور کی احتساب عدالت پیش کیا گیا، حمزہ شہباز کی آمد کے موقع پرسکیورٹی کے سخت انتظامات کئے گئے، سڑکوں پر کنٹینرزاوررکاوٹیں لگا کرراستے بھی بند کردئیے گئے، جس سے سائلوں، راہگیروں اور وکلاء کومشکلات کا سامنا کرنا پڑا۔

 عدالت نے حمزہ شہباز کو مزید 14 روزہ جوڈیشل ریمانڈ پر جیل بھجواتے ہوئے سماعت 16 اکتوبر تک ملتوی کردی ۔

واضح رہے کہ حمزہ شہباز کو انہی کیسز میں گزشتہ ماہ 18 ستمبرکواحتساب عدالت میں پیش کیا گیا تھا اور اس موقع پر عدالت نے ان کے ریمانڈ میں 2 اکتوبر تک توسیع دی تھی۔

 رمضان شوگر مل کے لیے نالہ بنانے پر کروڑوں روپے قومی خزانے سے خرچ کرنے کے حوالے سے ریفرنس میں شہباز شریف اور حمزہ شہباز پر فرد جرم عائد کی جا چکی ہے۔

قومی احتساب بیورو نے 11 جنوری 2018 کو رمضان شوگر ملز کیس کا ریفرنس مکمل کرتے ہوئے شہباز شریف اور حمزہ شہباز کو ملزم نامزد کیا تھا، بعد میں چیئرمین نیب کی منظوری کے بعد ریفرنس دائر کیا گیا تھا۔