وزیر خارجہ شاہ محمود قریشی نے کہا ہے کہ  54سال بعد دنیا بھر میں مسئلہ کشمیر پر بات ہورہی ہے اور کشمیر بنے گا پاکستان کے نعرے لگ رہے ہیں۔

تفصیلات کے مطابق وزیر خارجہ مخدوم شاہ محمود قریشی نے گرین لینڈ میرج کلب میں پی ٹی آئی کے شمولیتی جلسہ سے خطاب کرتے ہوئے کہا کہ پاکستان محفوظ ہاتھوں میں ہے۔

وزیر خارجہ کا کہنا تھا کہ شیخ مظہرعباس کو تحریک انصاف میں شمولیت پر خوش آمدید کہتا ہوں، تحریک انصاف کی حکومت میں نوجوانوں کا کردار ہے۔

شاہ محمود قریشی کا یہ بھی کہنا تھا کہ آج کا اجتماع مثالی اجتماع ہے، نوجوانوں نے پیپلز پارٹی اور ن لیگ کو چھوڑ کر تحریک انصاف کا ساتھ دے کر یہ ثابت کیا کہ وہ تبدیلی لے آئے ہیں۔

وزیر خارجہ نے  اپنے خطاب میں کہا کہ پنجاب کے بعد انشاءاللہ اب اگلے انتخابات میں سندھ میں بھی تحریک انصاف کی حکومت ہوگی۔

شاہ محمود قریشی نے یہ بھی کہا کہ نوجوانوں کو آج روزگار کی ضرورت ہے، ہم نے مشکل فیصلے کئے، ڈالر مہنگا ہوگا تو مہنگائی ہوگی اور اب معیشت استحکام کی جانب آ رہی ہے، معیشت کے حالات بدلیں گے۔

شاہ محمود قریشی کا کہنا تھا کہ چین کا بڑا انویسٹر پاکستان میں سرمایہ کاری کے لیے تیار ہے ، آج پھر کہتا ہوں کہ سی پیک کا منصوبہ بھی مکمل ہوگا، شاہ محمود قریشی کا مزید کہنا تھا کہ اللہ نے جو عمران خان کو عزت دی ہے وہ برقرار رہے گی۔

وزیر خارجہ مخدوم شاہ محمود قریشی کا مزید کہنا تھا کہ اقوام متحدہ عمران خان کے ساتھ اظہار یکجہتی کیلئے کھڑا تھا، عمران خان ایران اور سعودی عرب جارہے ہیں، انشاءاللہ  دونوں ممالک کے درمیان غلط فہمیاں دور کریں گے۔