وزیراعلیٰ پنجاب سردارعثمان بزدار سے وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کی ملاقات ہوئی۔

ملاقات میں وزیراعلیٰ اوروزیراعظم کی معاون خصوصی نے مقبوضہ کشمیر میں بھارتی بربریت کی شدید مذمت کرتے ہوئے مظلوم کشمیری عوام سے یکجہتی کا اظہار کیا اور باہمی دلچسپی کے امور،عوام کو ریلیف دینے کے اقدامات کے منصوبوں پر بھی تبادلہ خیال کیا۔

سردار عثمان بزدار نے کہا کہ وزیراعظم عمران خان نے ہر فورم پر کشمیر کا مقدمہ کشمیر کا سفیر بن کر موثر انداز میں لڑا ہے۔مودی سرکارنے مقبوضہ کشمیر میں انسانی حقوق کی پامالی کی تمام حدیں عبورکرلی ہیں۔

عثمان بزدار نے یہ بھی کہا کہ عالمی برادری کو ظالم کا ہاتھ روکنے کیلئے عملی اقدامات کرنا ہوں گے۔ مسئلہ کشمیر پر دنیا کو زمین کا خطہ سمجھ کر نہیں بلکہ انسانی مسئلہ سمجھ کر اپنا کردارادا کرنا ہوگا۔

عثمان بزدار کا کہنا تھا کہ کرپٹ عناصر کا بلاامتیاز احتساب پاکستان کی ترقی و خوشحالی کا ضامن ہے اور قومی وسائل کے غلط استعمال کی سابقہ روایت کو ختم کردیا ہے۔

عثمان بزدار کا یہ بھی کہنا تھا کہ عوام کا پیسہ عوام کی امانت ہے اوراب عوام پر ہی صرف ہو رہا ہے۔عوامی خدمت کے سفر کو جاری رکھیں گےاورعوام کے معیار زندگی میں بہتری لانے کیلئے دن رات کام کررہے ہیں۔

عثمان بزدار کا مزید کہنا تھا کہ احساس کا جذبہ عام کرنا چاہتے ہیں اور تبدیلی کا آغاز بھی ہوچکا،ہرشعبہ ہائے زندگی میں بہتری لائیں گے۔

جبکہ اس موقع پر معاون خصوصی برائے اطلاعات و نشریات ڈاکٹر فردوس عاشق اعوان نے کہا کہ عوام کو ریلیف کے راستے میں حائل رکاوٹیں دور کرنے کیلئے موثر قانون سازی پنجاب حکومت کی کارکردگی کا منہ بولتا ثبوت ہے۔

 مختلف شعبوں میں اصلاحات سے نادار طبقے کو سماجی تحفظ حاصل ہوگا کیونکہ میرٹ کی حکمرانی تحریک انصاف کی حکومت کا طرۂ امتیازہے۔

فردوس عاشق اعوان کا یہ بھی کہنا تھا کہ اپوزیشن کا بیانیہ پٹ چکا،عوام کو پٹے ہوئے مہروں سے کوئی دلچسپی نہیں۔

ملاقات میں وزیراعظم کی معاون خصوصی برائے اطلاعات نے سیالکوٹ میں تعلیم،صحت اوردیگر جاری ترقیاتی سکیموں کے حوالے سے تجاویز پیش کیں۔