پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان سمیت دنیا بھر میں ایچ آئی وی سنگین مسئلہ ہے اور ایچ آئی وی پر فوری قابو پانے کےلیے مسلسل جنگ لڑنا ہوگی۔

تفصیلات کے مطابق پاکستان پیپلز پارٹی کے چیئرمین بلاول بھٹو زرداری نے لاڑکانہ میں ایچ آئی وی ٹریٹمنٹ سپورٹ سینٹر رتو ڈیرو کے افتتاح کے بعد میڈیا سے بات کرتے ہوئے کہا کہ سندھ حکومت کا ایچ آئی وی کے مسئلے پر یونیسیف اور دیگر ملکی اداروں کے ساتھ مل کر کام کر رہی ہے اور ہم ایچ آئی وی کی علاج گاہ کا معیار برقرار رکھیں گے۔

پاکستان پیپلز پارٹی کے چیئرمین کا کہنا تھا کہ سندھ کے ہر بچےکو سمجھانا ہے کہ ایچ آئی وی سے خود کو کیسے بچائیں جبکہ ہماری خواہش ہے کہ رتو ڈیرومیں ایچ آئی وی ٹریٹمنٹ کا مرکز دوسروں کے لیے مثال بنے۔

بلاول بھٹو زرداری نے حکومت پر تنقید کرتے ہوئے کہا کہ فواد چودھری کا بیانیہ ہی خان صاحب کی اصل پالیسی ہے، ایک سال میں سازش کےتحت ہرادارے سےلوگوں کو بیروزگارکیا گیا اور زراعت صنعت کےشعبوں کو نقصان بھی ہہنچایا ۔

بلاول بھٹو نے یہ بھی کہا کہ پاکستان پیپلز پارٹی سمجھتی ہے کہ حکومت کو گھر جانا پڑے گا، حکومت کو گھر بھیجنے کے مطالبے پر مولانا فضل الرحمان کے ساتھ ہیں۔

بلاول بھٹو زرداری کا کہنا تھا کہ اے پی سی میں طے ہوا تھا کہ سیاسی جماعتیں ضمنی الیکشن میں ایک دوسرے کو سپورٹ کرینگی، ن لیگ نے لاڑکانہ ضمنی الیکشن میں سپورٹ پر شکریہ ادا کرتا ہوں جبکہ بنوں ضمنی الیکشن میں ہم نے بھی جےیوآئی کی سپورٹ کی۔

بلاول بھٹو زرداری کا یہ بھی کہنا تھا کہ پچھلے الیکشن میں جان بوجھ کر سلیکٹیڈ کو جتوایا گیا، پورا پاکستان لاڑکانہ ضمنی الیکشن کو مانیٹر کرےگا، پی ایس گیارہ ضمنی الیکشن میں ہمارے امیدوار کا مقابلہ تین جماعتوں سے ہےاورسندھ اور پی ایس گیارہ کےعوام پیپلزپارٹی کا ساتھ دینگے۔

پاکستان پیپلز پارٹی کے چیئرمین بلاول بھٹو زرداری کا مزید کہنا تھا کہ ہم چاہتے ہیں کہ امن ہو، ایران میں جنگ ہوئی تو اس کے اثرات پاکستان میں بھی ہوں گے، خطے میں امن کے لیے اچھا قدم اٹھایا گیا ہے تاہم ہم سب کی کوشش ہونی چاہیے کہ جنگ نہ ہو۔