اسلام آباد میں وزیراعظم عمران خان سے وزیراعلیٰ پنجاب سردار عثمان بزدار کی ملاقات ہوئی۔

ملاقات میں جمعیت علمائے اسلام ف کے امیر مولانا فضل الرحمان کے دھرنے کے حوالے سے تبادلہ خیال کیا گیا۔

اس موقع پر وزیراعظم عمران خان نے وزیراعلی پنجاب کو متوقع دھرنے کے کیے حکمت عملی کے حوالے سے آگاہ کیا۔

وزیراعظم سے ملاقات میں وزیراعلیٰ پنجاب نے پنجاب کی سیاسی صورتحال ، حکومتی کارکردگی اور ڈینگی سے متعلق بھی عمران خان کو آگاہ کیا۔

واضح رہے کہ اس سے قبل وزیراعظم عمران خان نے وزیراعلی پنجاب سردار عثمان بزدار کو آج شام اسلام آباد بلا لیا تھا، ملاقات میں آزادی مارچ، ڈاکٹرز کا احتجاج اور ترقیاتی منصوبوں کے امور زیر بحث آئیں گے۔

ذرائع کے مطا بق وزیراعظم اور وزیراعلی عثمان بزدار کی ملاقات میں آزادی مارچ کے حوالے سے پنجاب حکومت کی حکمت عملی زیرغور آنے کا امکان ہے جبکہ وزیراعلی آزادی مارچ کے حوالے سے وزیراعظم سے رہنمائی بھی حاصل کریں گے۔

یاد رہے کہ وزیر اعظم عمران خان نے وفاقی کابینہ کا اجلاس 16 اکتوبر کو طلب کرلیا ہے جبکہ وفاقی کابینہ کے اجلاس کا 15 نکاتی ایجنڈا بھی جاری کردیا گیا ہے۔

کابینہ اجلاس میں وزیر اعظم دورہ چین پر کابینہ کو اعتماد میں لیں گے، وزیر اعظم کے دورہ سعودی عرب اور ایران پر بھی مشاورت کی جائے گی۔
اس کے علاوہ ملکی سیاسی اور معاشی صورتحال کا جائزہ لیا جائے گا۔