وزیراعظم کی معاون خصوصی برائے اطلاعات فردوس عاشق اعوان نے کہاہے کہ مولانافضل الرحمان اپنی انا، ضد اور ذات کے خول سے باہر نکلیں، پاکستان کو درپیش چیلنجز کے تناظر میں اتحاد اور یکجہتی وقت کی اہم ضرورت ہے۔

تفصیلات کے مطابق سماجی رابطے کی ویب سائٹ ٹویٹرپرمولانافضل الرحمان کےآزادی مارچ سےمتعلق بیان دیتےہوئےڈاکٹرفردوس عاشق اعوان نےکہاکہ قومی ترقی کےحصول اور پاکستان کو عظیم تربنانے کیلئےسب کو مل کرکاوشیں کرنا ہوں گی۔

انہوں نےکہاکہ امن کے لئے قوم نے بہت بھاری قیمت دی ہےاورہزاروں جانوں کی قربانی سے ملک میں امن کے دیے روشن ہوئے۔

معاون خصوصی کامزید کہناتھا کہ مولانافضل الرحمان امن کے چراغ کیوں بجھانا چاہتے ہیں؟ جمہوریت میں مذاکرات ہی غلط فہمیوں کے خاتمے اور اتفاق رائے پیدا کرنے کا واحد راستہ ہے۔بات چیت سے ہی مسائل کا حل نکلتا ہے۔

واضح رہے کہ آزادی مارچ سے نمٹنےکیلئےقائم حکومتی مذاکراتی کمیٹی آج وزیراعظم عمران خان سے ملاقات کرے گی۔

جمعیت علمائےاسلام (ف) اوراپوزیشن کےآزادی مارچ کےمعاملےپررہبرکمیٹی سے ہونےوالےمذاکرات کے بارے میں عمران خان کو بریفنگ دی جائے گی۔

 مذاکراتی کمیٹی کی سفارشات پر وزیراعظم آگے کی حکمت عملی پر ہدایات دیں گےاور وزیراعظم کو اپوزیشن کے مطالبات سے آگاہ کیا جائے گا۔

وزیراعظم نےحکومتی مذاکراتی کمیٹی کے سربراہ پرویزخٹک کوآج طلب کیاہے، پرویز خٹک وزیراعظم سے اپوزیشن سے ہونے والی بات چیت پر مشاورت کریں گے۔

ذرائع کاکہناہے کہ پرویز خٹک وزیراعظم کواپوزیشن کےمطالبات سےآگاہ کریں گےمذاکرات کے بارے میں وزیراعظم سے ہدایات لیں گے۔

خیال رہے کہ حکومت اوراپوزیشن کےدرمیان آزادی مارچ کےمقام پرڈیڈلاک موجودہے۔گزشتہ روز حکومتی مذاکراتی کمیٹی اور اپوزیشن کی رہبر کمیٹی کے درمیان آزادی مارچ سےمتعلق مذاکرات کے دوادوار ہوئے تاہم یہ دونوں ادوار بے نتیجہ رہے اور حکومت اوراپوزیشن کمیٹیوں کےدرمیان ڈیڈلاک پیداہوگیا،فریقین نے بات چیت کا سلسلہ جاری رکھنے پر اتفاق کیا ہے۔