مسلم لیگ ن کے سنیئر رہنماوں نے علاج کے لئے نواز شریف کے باہر جانے کا فیصلہ مسلم لیگ ن کے قائد پرہی چھوڑ دیا ہے۔

تفصیلات کے مطابق مسلم لیگ ن کے رہنما خواجہ آصف کا کہنا یہ اختیار پا رٹی قائد نوازشریف کا ہے کہ وہ باہر علاج کروانا چاہتے ہیں یا ملک کے اندر ہی ۔

خواجہ آصف نے کہا کہ آزادی مارچ شیڈول کے مطابق ہو گا، حکمرانوں کی چھوٹی سوچ پر افسوس ہے، قوم سے نوازشریف کی صحت کے لئے دعاوں کی اپیل ہے۔

انھوں نے کہا کہ حکمرانوں کی بدلے کی آگ ٹھنڈی نہیں ہو رہی، انتقامی کارروائیاں آج بھی جاری ہیں، ایک طرف رابطے کر کے تیمارداری کی اجازت مانگی جا رہی ہے دوسری طرف انتقامی اقدامات جاری ہیں،بیرون ملک یا اندرون ملک علاج کا معاملہ نوازشریف پر چھوڑتے ہیں، گو نوازشریف کی صحت خراب ہے اورپارٹی اس حوالے سے مصروف ہے تاہم آزادی مارچ اپنے شیڈول کے مطابق ہوگا، پارٹی بھرپور شرکت کرے گی۔

دوسری طرف پارٹی کے سیکرٹری جنرل احسن اقبال نے بھی نوازشریف کی صحت کے لئے دعاوں کی اپیل کرتے ہوئے کہا کہ نوازشریف کی صحت کے حوالے سے ڈاکٹرز کے خدشات برقرار ہیں۔ ایسی صورتحال میں بھی حکمرانوں کے انتقامی اورچھوٹی سوچ کے اقدامات جاری ہیں۔

انھوں نے کہا کہ مریم نواز کو رات دوبجے کوٹ لکھپت جیل واپس جانے کا کہا گیا، نوازشریف کوپانچ بجے نیند سے جگایا گیا، کونسا جنگ کا خطرہ تھا کہ نوازشریف کو جگا کر پانچ بجے مریم کوجیل بھیجا گیا۔

مسلم لیگ ن کے سینئر رہنماوں کا کہنا ہے کہ حکومتی نمائندوں نے جس طرح کی زبان استعمال کی وہ بھولی نہیں جائے گی، حکمرانوں کی بدلے کی آگ ٹھنڈی نہیں ہو رہی، انتقامی کارروائیاں آج بھی جاری ہیں۔

رہنماوں نے کہا کہ نوازشریف کی رہائی کے حوالے سے قانونی، عدالتی اور سیاسی جنگ جاری رہے گی۔