وزیراعظم عمران خان نے کہا ہے کہ پاکستان اسٹیل کی بحالی حکومت کی اولین ترجیحات میں شامل ہے۔

تفصیلات کے مطابق وزیرِاعظم عمران خان کی زیر صدارت پاکستان اسٹیل ملز کی بحالی کے حوالے سے اجلاس ہوا ، جس میں پاکستان اسٹیل ملز کی بحالی کے سلسلے میں کی جانے والی کوششوں پر غور کیا گیا۔

اجلاس میں مشیر تجارت عبدالرزاق داؤد، وزیر نجکاری میاں محمد سومرو، چیئرمین بورڈ آف ڈائریکٹرز پاکستان اسٹیل ملزعامر ممتاز و دیگر شریک ہوئے۔

اجلاس میں پاکستان اسٹیل ملز کی بحالی کے حوالے سے چین اور روس کی کمپنیوں کی جانب سے دلچسپی کا اظہارکیا گیا ہے۔

اس موقع پروزیراعظم کو پاکستان اسٹیل کی بحالی کے لئے کوششوں اور مختلف آپشنز پر بریفنگ دی گئی۔

عمران خان نے اجلاس سے خطاب میں کہا کہ سالہا سال سے سرکاری خزانے پر بوجھ بننے والے اس ادارے کی بحالی کو ماضی کی حکومتوں کی  جانب سے فراموش کیا جانا قوم پر ظلم کے مترادف ہے، کوشش ہے کہ پاکستان اسٹیل کو بحال کرکے خزانے پرہر ماہ پڑنے والے بوجھ کو ختم کیا جا سکے۔

وزیراعظم نے یہ بھی کہا کہ حکومت کی ہر ممکن کوشش ہے کہ پاکستان اسٹیل کو بحال کرکے منافع بخش ادارہ بنایا جائے۔

وزیراعظم عمران خان کا مزید کہنا تھا کہ ادارے کو فعال بنایا جائے تاکہ وہ ملکی تعمیر و ترقی میں اپنا کردار ادا کر سکے۔

دوسری جانب وزیراعظم عمران کی زیر صدارت ایک اور اجلاس ہوا جس میں سی پیک کے منصوبوں کا جائزہ لیا گیا۔

ذرائع کے مطابق اجلاس میں وزیراعظم عمران خان کے دورہ چین کو حتمی شکل دے دی گئی ہے، وزیراعظم دورہ چین میں سی پیک کی پیش رفت پر گفتگو کریں گے۔

ذرائع کا کہنا تھا کہ دورہ چین میں عمران خان کے ہمراہ تین وفاقی وزرا اور ایک مشیر ہوں گے، جن میں وزیر خارجہ شاہ محمود قریشی، وزیر ریلوے شیخ رشید، وزیرمنصوبہ بندی خسروبختیار اور مشیر خزانہ عبدالحفیظ شیخ شامل ہیں۔

ذرائع کا یہ بھی کہنا تھا کہ وزیراعظم کے دورہ چین میں متعدد مفاہمتی یادداشتوں پر بھی دستخط ہوں گے جبکہ وہ چینی صدر شی جن پنگ سمیت اعلیٰ قیادت سے ملاقات کریں گے۔

ذرائع کا مزید کہنا تھا کہ اجلاس میں وفاقی وزیر منصوبہ بندی، خسرو بختیار، سیکرٹری خارجہ سمیت دیگر حکام نے شرکت کی اور وزیراعظم کو سی پیک منصوبوں کی رفتار اور کام سے آگاہ کیا گیا۔