پنجاب حکومت کی جانب سے اورنج لائن میٹرو ٹرین کو 28 اکتوبر سے چلائے جانے کا اعلان کردیا گیا ہے۔

تفصیلات کے مطابق پنجاب حکومت کے اعلان کے مطابق ٹرین لاہور کے علاقوں ڈیرہ گجراں تا انارکلی چلائی جائے گی،اورنج لائن کے ڈیرہ گجراں سے انار کلی تک کے 13 اسٹیشنز پر کام مکمل کر لیا گیا اور اب ٹرین کو آزمائشی طور پر پہلی بار بجلی سے چلانے کا تجربہ بھی کیا جائے گا۔

ذرائع کے مطابق دیگر 11 اسٹیشنز پر کام نومبر کے اوائل تک مکمل کر لیا جائے گا جس کے بعد اورنج لائن ٹرین کو پورے ٹریک پر بجلی سے چلا کر چیک کیا جائے گا۔

اورنج لائن میٹروٹرین کے آزمائشی سفر کے موقع پر منعقد کی جانے والی تقریب کے مہمان خصوصی وزیراعلیٰ پنجاب سردار عثمان بزدار ہوں گے جبکہ وزیراعلیٰ پنجاب کا کہنا ہے کہ جنوری میں عوام ٹرین پر سفر کر سکیں گے اور اس کا کرایہ عام آدمی کی پہنچ میں رکھا جائے گا۔

اورنج لائن میٹرو کو آپریشنل کرنے کے حوالے سے وزیر اعلی پنجاب عثمان بزدار کی زیرصدارت اجلاس ہوا جس میں منصوبے کا تفصیلی جائزہ لیا گیا اور ٹرین کے آزمائشی سفر کے حوالے سے بریفنگ بھی دی گئی۔

صوبائی وزیر ٹرانسپورٹ جہانزیب خان کھچی، پرنسپل سیکرٹری وزیراعلیٰ پنجاب، پنجاب ماس ٹرانزٹ اتھارٹی کے حکام، ڈی جی ایل ڈی اے اور متعلقہ حکام کی اجلاس میں شرکت تھے۔

واضح رہے کہ وزیراعلیٰ پنجاب نے منصوبے کو عوام کیلئے جلد سے جلد آپریشنل کرنے کی ہدایت جاری کی تھیں۔

سپریم کورٹ آف پاکستان نے اورنج لائن میٹرو ٹرین منصوبے کی تکمیل میں تاخیر پر برہمی کا اظہار کرتے ہوئے منصوبے کی تکمیل کیلئے اگلے سال جنوری تک کی مہلت دی تھی۔