پاکستان پیپلز پارٹی کے چیئرمین بلاول بھٹو کا کہنا ہے کہ حکومت نے نوجوانوں کو بے روزگار کردیا مگر ایک نوکری نہیں دی۔

تفصیلات کے مطابق پاکستان پیپلز پارٹی کے چیئرمین بلاول بھٹو نے میڈیا سے گفتگو کرتے ہوئے کہا کہ پیپلز پارٹی ایسا کوئی قدم نہیں اٹھائے گی جس سے جمہوریت کو نقصان ہو، ہم ظلم برداشت کرنے کو تیار ہیں مگر سمجھوتہ نہیں کریں گے۔

بلاول بھٹو کا کہنا تھا کہ پارلیمان میں عوامی مسائل پر بات نہیں ہوتی اور نہ ہی پیپلز پارٹی کوعوام کی خدمت نہیں کرنے دی جارہی آج ایک سال گزر گیا ہے۔انھوں نے کہا کہ اگر ہرادارہ اپنا کام کرے گا تو ہم عوام کے مسائل حل کر پائیں گے۔

پاکستان پیپلز پارٹی کے چیئرمین کا یہ بھی کہنا تھا کہ حکومت نے ایک سال میں صرف ایک ریفرنس فائل ہوا، اس ریفرنس میں بھی صرف ڈیڑھ کروڑ کا الزام ہے اور ابھی تک ریفرنس میں کوئی ثبوت پیش نہیں کیا گیا۔

بلاول بھٹو نے کہا کہ جھوٹے الزام لگا کر دباؤ میں ڈالنے کی کوشش کی جارہی ہے اور پیپلز پارٹی 1973 کے آئین اور 18 ویں ترمیم پر سمجھوتہ نہیں کریں گے۔

پاکستان پیپلز پارٹی کے چیئرمین نے یہ بھی کہا کہ آصف زرداری نے پہلے بھی بغیر کسی جرم کے ساڑھے 11 سال جیل کاٹی۔،ٓصف زرداری اب بھی جیلیں کاٹنے کو تیار ہیں۔

پاکستان پیپلز پارٹی کے چیئرمین بلاول بھٹو نے مزید کہا کہ مولانا فضل الرحمٰن نے 27 اکتوبر کو یوم سیاہ کا اعلان کیا ہے، مولانا فضل الرحمٰن کی کس حد تک مدد کر سکتے ہیں، اکتوبر کے بعد ہم جنوبی پنجاب میں عوام سے رابطے کریں گے۔