آزادی مارچ پر مسلم لیگ ن نے مشاورت کا فیصلہ کرتے ہو ئے آج اعلی سطح کا اجلا س طلب کر لیا ہے۔

تفصیلات کے مطابق مسلم لیگ ن کے رہنما اور اپوزیشن لیڈرشہباز شریف نے پارٹی کا اہم اجلاس آج طلب کرلیا ہے، اجلاس میں پارٹی کے سینئر رہنما شریک ہوں گے۔

ذرائع کے مطابق اجلاس تین بجے شہباز شریف کی زیر صدارت ہوگا، اجلاس میں مولانا کے آزادی مارچ میں شمولیت کے لائحہ عمل پر مشاورت ہوگی۔

دوسری جا نب اُدھر آزادی مارچ کے حوالے سے جمعیت علما اسلام کل مسلم لیگ ن کی تجاویز کا جائزہ لے گی جبکہ جمعیت علما اسلام کی پالیسی کمیٹی کا اجلاس بھی کل ہوگا۔

مسلم لیگ ن کے سیکرٹری جنرل احسن اقبال نے اس با رے میں  بتایا کہ جمعیت علما اسلام کل پالیسی کمیٹی میں تجاویز کا جائزہ لینے کے بعد جواب دے گی، پالیسی کمیٹی میں تمام اپوزیشن جماعتوں کی تجاویز کا جائزہ بھی لیا جائے گا۔

احسن اقبال کا مزید کہنا ہے کہ جمعیت علما اسلام نے نواز شریف کی تجاویز کا خیر مقدم کیا ہے، جمعیت علما اسلام کے جواب کے بعد مسلم لیگ ن اپنا اجلاس پھر بلائے گی۔ 

واضح رہے کہ 3 اکتوبر کو سابق وزیراعظم نواز شریف نے شہبازشریف سے ملاقات میں آزادی مارچ میں پیپلزپارٹی کوساتھ ملانے کی ہدایت کی تھی اور واضح کیا تھا کہ جب  تک پیپلزپارٹی ساتھ نہ ہوں، مارچ میں تاخیرکی جائے، اپوزیشن کا اتفاق ہو جائے، تو شہبازشریف خود مارچ کی قیادت کریں۔

ان ہدایات کے بعد شہباز شریف نےجواب میں کہا تھا کہ صحت اس چیز کی اجازت نہیں دیتی، ڈاکٹرز نے آرام کا مشورہ دیا ہے

 اس صورتحال کے بعد فیصلہ ہوا کہ احسن اقبال اوردیگر مسلم لیگ ن کے رہنما مارچ میں پارٹی کی قیادت کریں گے۔