پاکستان پیپلز پارٹی کے چیئرمین بلاول بھٹو زرداری نے کہا ہے کہ سلیکٹڈ حکومت عوامی مسائل حل نہیں کرسکتی،اب وقت آگیا ہے کہ حکومت کو گھر بھیجنے کے لئے سیاست کی جائے۔

تفصیلات کے مطابق کراچی میں پیپلز پارٹی کے جلسے سے خطاب کرتے ہوئے پاکستان پیپلز پارٹی کے چیئرمین بلاول بھٹو زرداری نے کہا کہ وزیراعظم عمران کا ہر وعدہ ہر دعوی جھوٹا نکلا، اس حکومت کو اور وقت دینا ملک کی سالمیت سے کھیلنے کے مترادف ہوگا۔

بلاول بھٹو زرداری کا کہنا تھا کہ ملک میں تاجر ، کسان ، مزدور سب سڑکوں پر ہیں، سلیکٹیڈ وزیر اعظم  نا خود کام کرتے ہیں نا کرنے دیتے ہیں، کراچی پیکج پر اعلان کے باوجود کراچی کو ایک روپیہ عمران نے نہیں دیا۔

پاکستان پیپلز پارٹی کے چیئرمین کا یہ بھی کہنا تھا کہ منتخب سیاستدانوں کو جیل میں بھیج دیا گیا ہے جبکہ کالعدم تنظیموں کو سپورٹ کیا جارہا ہے، 2018 کے عام انتخابات میں دھاندلی کرکے الیکشن کو متنازع بنایا گیا اور پولنگ ایجنٹس کو اسٹیشن سے باہر نکال دیا گیا۔

پیپلز پارٹی کے جلسے سے خطاب کرتے ہوئے بلاول بھٹو زرداری نے یہ بھی کہا کہ جب دھاندلی زدہ حکومت آتی ہے تو پھر وہ عوام کا خیال نہیں کرتی، وہ کسی اور کی خواہش پر اقتدار میں آتے ہیں۔

پاکستان پیپلز پارٹی کے چیئرمین بلاول بھٹو زرداری نے مزید کہا کہ ہم اپنے مینڈیٹ پر ڈاکا نہیں پڑنے دیں گے اور ہم عمران خان کی دھاندلی زدہ حکومت کو بے نقاب کریں گے اور اس کے خلاف آواز اٹھاتے رہیں گے۔