بول  ایک بار پھر مظلوم شہریوں کی آواز بن گیا ،شارٹ ٹرم کڈنیپنگ میں ملوث اہلکاروں اور مخبروں کےگٹھ جوڑکا مکروہ دھندا بے نقاب کردیا۔

تفصیلات کے مطابق بول کی جانب سے معاملہ اٹھانے پر ایس ایس پی کورنگی فیصل چاچڑ نے ایکشن لیتے ہوئے  ناصر کالونی  چوکی کے انچارج سراج خٹک کو معطل کردیا۔

بول نیوز کی تفتیش کے مطابق کالے دھندے میں ملوث مجرم جو کہ چوکی انچارج سراج خٹک کا فرنٹ مین ہے جبکہ مخبرذاکرجرائم پیشہ ہے اور اسے پولیس چوکی ناصر کالونی کی پوری سرپرستی حاصل ہے۔

ایس ایس پی فیصل چاچڑ کا بول نیوز سے بات کرتے ہوئے کہنا تھا کہ بول نے اچھا کام کیا امید ہے اسی طرح کالی وردی میں چھپی کالی بھیڑوں کو بےنقاب کرتا رہے گا۔

ایس ایس پی کا یہ بھی کہنا تھا کہ پولیس اہلکاروں نے ندیم گوگا کواٹھایا اور پھرقیمت لیکر چھوڑ دیا تھا جبکہ ملزم ذاکر کو غریبوں سے پیسے بٹورنے کا ٹاسک دیا گیا تھا،مخبر ذاکر کےذریعے نابینا مزدور سے بھی 65ہزار روپے بھتہ وصول کئے تھے۔

ایس ایس پی فیصل چاچڑ کا مزید کہنا تھا کہ ملزمان سے تفتیش کیلئےایس پی توصیف احمد کوانکوائری آفیسر مقرر کیا گیا ہے،جو 7 روز میں رپورٹ پیش کریں گے۔

 واضح رہے کہ اس سے قبل بول نیوز نے اسٹنگ آپریشن کےذریعے پولیس اورمخبروں کا گٹھ جوڑبے نقاب کردیا تھا۔

بول نیوز نے کالی وردی میں چھپی کالی بھیڑوں کا پول کھولتے ہوئے تھانہ کورنگی انڈسٹریل ایریا کی چوکیوں میں  کالے کرتوت بے نقاب کرنے کیلئے اسٹنگ آپریشن کیا تھا۔

بول نیوز کے مطابق اسٹنگ آپریشن کے وقت پولیس کی وردی میں جعلی اہلکاربن کر لوٹ مار کی جارہی تھی اور پولیس مخبروں کےذریعےشہریوں سےتاوان بٹوررہی تھی۔