وزیراعظم عمران خان کل تین روزہ دورے پر چین روانہ ہوں گے۔

وزیراعظم کے دورہ میں تین وفاقی وزراء اور ایک مشیر اُن کے ہمراہ جائیں گے، جن میں وزیر خارجہ شاہ محمود قریشی، وزیر منصوبہ بندی خسرو بختیار، وزیر ریلوے شیخ رشید ، مشیر خزانہ عبدالحفیظ شیخ اور سینئر افسران بھی وزیراعظم کے ہمراہ جائیں گے۔

دورہ چین کے دوران عمران خان چینی صدر شی جن پنگ سمیت اعلیٰ چینی قیادت سے ملاقاتیں کریں گے جبکہ سی پیک ایم ایل ون اور دیگر اہم معاملات پر بھی ملاقاتیں ہوں گی ۔

وزیراعظم کے دورہ چین میں متعدد مفاہمتی یادداشتوں پر دستخط بھی ہوں گے، پاک چین جوائنٹ کوآرڈی نیشن کمیٹی کےامور بھی زیر غور آئیں گے۔

علاوہ ازیں دورہ چین کے دوران عمران خان مسئلہ کشمیر کے بارے میں چینی حکام سے بات چیت ہوگی اور مقبوضہ کشمیر معاملے میں حمایت پر بھی چینی قیادت کا شکریہ ادا کریں گے۔

واضح رہے اس سے قبل وفاقی وزیر ریلوے شیخ رشید نے دورہ چین سے پہلے اپنے ایک پیغام میں کہا تھا کہ عمران خان تین روزہ دورے پر چین جارہے ہیں اور وزیر اعظم کے دورہ چین میں معیشت ،اقتصادیات اور کشمیر کا مسئلہ زیر بحث آئے گا۔

وفاقی وزیر ریلوے شیخ رشید نے یہ بھی کہا تھا کہ چین کے ساتھ دوستی ہمالیہ سے بلند ہےوہ ہر سیزن کا دوست ہے اور چین کے دورے میں معیشت کی ریڑھ کی ہڈی ایم ایل ون پر معاہدہ ہوگا، ہم چاہتے ہیں اس دورہ میں ایم ایل ٹو پر بھی معاملات طے پا جائیں۔

وزیر ریلوے کا مزید کہنا تھا کہ اپوزیشن سے درخواست کرتا ہوں کہ ملک کیلئے یہ وقت بہت نازک ہے ، اپنی ذات یا سیاست کیلئے ملک کو کسی بحران میں مبتلا نہ کریں۔