سیشن عدالت نے اشتعال انگیز تقاریر کیس میں کیپٹن ریٹائرڈ صفدر کی درخواست ضمانت منظور کرلی۔ عدالت نے لیگی رہنما کو 2 لاکھ کے مچلکے جمع کرانے کی ہدایت کر دی۔

تفصیلات کے مطا بق لاہور کی سیشن عدالت نے کیپٹن(ر)صفدر کی درخواست ضمانت پر آج فیصلہ سنایا ہے ، کیپٹن(ر)صفدراشتعال انگیزتقریر کرنے کے الزام میں گرفتار تھے،عدالت نے گزشتہ روز وکلا کے دلائل مکمل ہونے پر فیصلہ محفوظ کیا تھا۔

ذرائع کے مطا بق گذشتہ روز عدالت نے کپٹین ریٹائرڈ صفدر کی درخواست ضمانت اور جسمانی ریمانڈ نہ دینے کے خلاف درخواست پر فیصلہ محفوظ کیا تھا، لاہور کے ایڈیشنل سیشن جج تجمل شہزاد نے کیپٹن ریٹائرڈ صفدر کی ضمانت اور پراسیکیونش کی الگ الگ درخواستوں پر سماعت کی اور وکلا کے دلائل سنے تھے۔

عدالت کیپٹن ریٹائرڈ صفدر کا جسمانی ریمانڈ نہ دینے کے خلاف دائر اپیل پر بھی آج فیصلہ سنائے گی، ضلع کچہری سے درخواست ضمانت مسترد ہونے پر کیپٹن صفدر نے سیشن کورٹ سے رجوع کر رکھا ہے۔

ذرائع کے مطا بق کیپٹن ریٹائرڈ صفدر کے وکیل نے جوڈیشل ریمانڈ کی جگہ جسمانی ریمانڈ دینے کی درخواست کی مخالفت کی اورکہا کہ یہ مقدمہ ہی بے بنیاد ہے اسے خارج کیا جائے۔

سرکاری وکیل نے ضمانت کی مخالفت کی اور بتایا کہ مقدمات کی دفعات ناقابل ضمانت ہیں ، استدعا ہے کیپٹن ریٹائرڈ صفدر سے تفتیش کرنی ہے اس لیے ان کا جسمانی ریمانڈ دیا جائے۔

واضح رہے کہ لاہور پولیس نے کیپٹن (ر) صفدر کو راوی ٹول پلازہ سے گرفتار کیا تھا، انہیں حکومت کے خلاف اشتعال انگیز تقریر کے الزام میں گرفتار کیا گیا تھا۔

کیپٹن ریٹائرڈ صفدر نے مریم نواز کی عدالت میں‌ پیشی کے دوران پولیس پر حملہ بھی کیا تھا اور اس کیس میں گرفتاری سے بچنے کے لیے انہوں نے ضمانت کرالی تھی۔