مصطفیٰ کمال کا کہنا ہے کہ لگتا ہے کہ نوکریوں کے معاملے پر پاکستانیوں کے ساتھ دھوکا ہو گیا ہے۔

تفصیلات کے مطابق کراچی میں نیب عدالت میں پیشی کے بعد میڈیا سے گفتگو کرتے ہوئے پاک سر زمین پارٹی  کے سربراہ مصطفیٰ کمال نے کہا کہ پی ٹی آئی نے انتخابی مہم ایک کروڑ نوکری کا کہہ کر چلائی تھی،اب تمام ہی پاکستانی نوکریوں کے معاملے پر بے یقینی کا شکار ہیں، ملک میں اقتدار گرانے کی جنگ چل رہی ہے، اختیارات کی نچلی سطح تک منتقلی کے لیے آئین میں ترمیم کی ضرورت ہے۔

مصطفی کمال نے کہا کہ پہلے فضل الرحمان کی تذلیل کی، اب مذاکرات کیلئے کمیٹی بنا دی گئی ہے، ملک میں اس وقت اقتدار گرانے کی جنگ ہے، عوام گھروں میں بیٹھنے کے بجائے اٹھیں اور احتجاج کریں، یہ ملک اس فرسودہ نظام کے تحت نہیں چل سکتا۔

واضح رہے کہ مصطفیٰ کمال اور سابق ڈی جی ایس بی سی اے افتخار قائم خانی ساحل پر اراضی کی غیر قانونی الاٹمنٹ ریفرنس میں کراچی کی احتساب عدالت میں پیش ہوئے۔
مصطفیٰ کمال کے وکیل حسان صابر نے عدالت سے استدعا کی کہ ہم چاہتے ہیں کہ ریفرنس کی جلد سماعت مکمل کی جائے، اس لیے ان درخواستوں کو ریفرنس سے الگ سنا جائے۔

احتساب عدالت کے جج نے کہا کہ ایک ہی معاملہ ہے، ساری درخواستوں کو ایک ساتھ سنا جائے گا،عدالت نے 26 اکتوبر کو نیب پراسیکیوٹر اور فریقین سے دلائل طلب کر لیے ہیں جبکہ نیب کے مطابق مصطفیٰ کمال اور دیگر کے خلاف اس کیس میں 5500 مربع گز زمین کی غیرقانونی الاٹمنٹ کا الزام ہے۔