پیپلز پارٹی کے رہنما خورشیدشاہ کو احتساب عدالت میں پیش کیا گیا ، جہاں نیب نے مزید 15 دن کے ریمانڈ کی استدعا کردی ہے۔

تفصیلات کے مطابق سکھر کی احتساب عدالت میں خورشیدشاہ کے خلاف اثاثہ جات کیس پر سماعت ہوئی جہاں خورشید احمد شاہ کو ریمانڈ مکمل ہونے کے بعد چوتھی بار پیش کیا گیا ہے۔

ذرائع کے مطابق سماعت شروع ہوئی تووکیل نیب نے کہا عدالت کےحکم پر ڈاکٹروں نے خورشید شاہ کامیڈیکل چیک اپ کیا، میڈیکل رپورٹ میں مجموعی حالت تسلی بخش قراردی گئی،وکیل نیب نے نیب کی جانب سےکی گئی تحقیقات سےعدالت کو آگاہ کیا اور کہا تحقیقات جاری ہیں مزید ریمانڈ دیا جائے، خورشید شاہ نیب سے مکمل تعاون نہیں کر رہے لہذا 15دن کا مزید ریمانڈ دیا جائے۔

نیب کے وکیل کے بعد رضا ربانی کا کہنا تھا کہ نیب نے جو بھی سوالات دیئے ان کا جواب جمع کرا دیا گیا ، پہلے دن سے کہنا تھا خورشید شاہ کو سیاسی انتقام کا نشانہ بنایا جارہا ہے، 5 ارب کی کہانی متاثرین باجوڑ کے اکاؤنٹ پرختم ہوتی ہے، گھر ،اسمبلی کے فنڈز ریزنگ اکاؤنٹ کی بنا پرحراست میں رکھا گیا ہے، یہ سب ہی پوچھنا اورکرنا تھا تو گرفتار کرنےکی کیا ضرورت تھی۔

واضح رہے 18 ستمبر کو نیب سکھر اور راولپنڈی نے مشترکہ کارروائی کرتے ہوئے آمدن سے زاید اثاثہ جات کیس میں پیپلز پا رٹی کے رہنما خورشید شاہ کو گرفتار کیا تھا ، بعد ازاں احتساب عدالت نے خورشید شاہ 21 ستمبر تک راہداری ریمانڈ پر نیب کے حوالے کردیا تھا