وزیراعظم عمران خان سے ہوچی سن پورٹ ہولڈنگ کمپنی کے وفد کی ملاقات ہوئی ہے۔

اس موقع پر ہوچی سن پورٹ ہولڈنگ کمپنی نے پاکستان میں 240 ملین ڈالر سرمایہ کاری کا اعلان کیا ، جس پر وزیراعظم نے کمپنی کی سرمایہ کاری، ملکی  معاشی خوشحالی کےعزم کا خیر مقدم کیا۔

ملاقات میں وزیراعظم کو ہوچی سن پورٹ ہولڈنگز گروپ کے بارے میں آگاہ کیا گیا جبکہ ہوچی سن گروپ نے پاکستان کی معیشیت کی بہتری میں اہم کردار ادا کرنے کا بھی عزم کیا۔

وزیراعظم کا کہنا تھا کہ حکومت ملک میں سرمایہ کاری کے مواقع پیدا کررہی ہے، کاروبار میں آسانی کے لئے اقدامات سے معیشیت بہتر اور روزگار کے مواقع پیدا ہوں گے۔

کمپنی کے مینجنگ ڈائریکٹر ایرک اپ کا کہنا تھا کہ ہوچی سن پورٹ ہولڈنگ کمپنی کراچی پورٹ کو ایشیا کی تجارت کا مرکز بنانے میں سہولت فراہم کرے گی۔

مینجنگ ڈائریکٹر ایرک اپ کا مزید کہنا تھا کہ پاکستان میں سرمایہ کو ایک ارب ڈالر تک بڑھایا جائے گا اور سرمایہ کاری کے نتیجے میں ہچیسن گروپ 3000 ملازمتیں بھی دے گا۔

ملاقات میں وزیربحری امور علی زیدی، مشیر تجارت رزاق دؤاد ، معاون خصوصی زلفی بخاری، سفیر برائےبیرونی سرمایہ کاری علی جہانگیر صدیقی ،ایمبسڈر ایٹ لارج علی صدیقی، چیئرمین سرمایہ کاری بورڈ اور سینئیر حکام بھی شریک تھے۔

واضح رہے اس سے کچھ دیر قبل وزیراعظم عمران خان سے بین الاقوامی اسلامی بینک کے چیف ایگزیکٹو شیخ علی بن عبداللہ الثانی کی ملاقات ہوئی تھی۔

ملاقات میں وزیراعظم عمران خان نے اس عزم کا اعادہ کیا کہ پاکستان خطہ کے ساتھ مضبوط برادرانہ تعلقات اور قریبی تعاون کو اہمیت دیتا ہے اور بالخصوص جون 2019ءمیں قطر کے امیر کے دورہ پاکستان کے بعد دونوں ممالک کے درمیان تعلقات میں بلندیوں پر اطمینان کا اظہار کیا ہے